Нұр-Сұлтанда ХІІ Қысқы қайырымдылық балы өтті. Салтанатты іс-шара «Болашақ» корпоративтік қорының бастамасымен 2012 жылдан бері өткізіліп келеді. Басты мақсат – ерекше күтімді қажет ететін балалардың сапалы білім алуына, спортпен айналысуына жағдай жасау. Мүмкіндігі шектеулі жандардың әлеуметтік мәселесіне қоғам назарын аудару. Кедергіге қарамай, мақсатына ұмтылған дарынды жастарға қолдау көрсету. Кештен жиналған қаражат қордың «Әр бала мектепке лайық» және «Жол жүру гранттары» қайырымдылық жобаларына аударылады.
Салтанатты кеште «Болашақ» корпоративтік қоры Қамқоршылық кеңесінің құрметті мүшесі Бауыржан Байбек қайырымдылық шарасының маңызына тоқталды.
– Отбасында ерекше қажеттілігі бар бала дүниеге келсе, әрине адамның тағдырына, өмірге деген көзқарасына әсер етеді. Көп жағдайда ондай ата-аналарға тағдыр тауқыметін жалғыз тартуға тура келеді. Сондықтан біздің мақсатымыз – оларға көмек қолын созу. Қазіргі таңда үкіметтік емес ұйымдардың көрсеткен көмегінің арқасында бұл мәселе іс жүзінде жүйелі шешімін тауып жатыр. Ерекше қажеттілігі бар балалардың құқығын іске асыру үшін тек «Болашақ» қорының мүшелері 60-тан астам қоғамға пайдалы ұсыныс пен инклюзивті білім беруді дамыту бөліміне қатысты заңнамалық актілерге түзетулер енгізді. «Әр бала мектепте оқуға лайық» және «Жол жүру гранты» жобаларының аясында жастарға халықаралық деңгейдегі ғылыми, шығармашылық және спорт сайыстарына қатысу үшін 19 білім беру және 71 жол жүру гранты берілді, – деді Бауыржан Байбек.
Дәстүрлі түрде өтіп келе жатқан қайырымдылық шарасынан 7 жыл ішінде қорға 400 миллион теңгеден астам қаражат келіп түсті. Қаржыға Қазақстан бойынша инклюзияны қолдайтын 43 кабинет ашылды. Аутизм дертіне шалдыққан және ерекше күтімді қажет ететін 400-ге жуық бала дені сау замандастарымен бірге мектепке барды. Жаңадан 445 жұмыс орны ашылды. Сондай-ақ 1000-нан астам маман қайта даярлаудан өтті. Әлеуметтік тұрмысы төмен отбасылардан шыққан және ерекше қажеттілігі бар жандарға халықаралық зияткерлік және спорттық жарыстарға 71 грант берді.
«Болашақ» қоры Қамқоршылық кеңесінің төрағасы Динара Шайжүнісованың айтуынша, мұндай шараның қоғамдағы мүмкіндігі шектеулі жандардың өмірін жақсартуға ықпалы зор.
– Бұл жай ғана салтанатты кеш емес. Бұл, ең алдымен көптеген адамның, кәсіпкерлер мен компаниялардың біздің қайырымдылық жобаларымызды іске асыруға қосқан үлесі. Бұдан өзге іс-шара арқылы қоғамда мейірім, адамгершілікті насихаттаймыз. Осы іс-шараны өткізуге қолдау көрсетіп келе жатқан серіктестеріміз: A+A Idea Fabric продюсерлік орталығы, Centrasia Group холдингі, сондай-ақ осы балдың бас демеушілері – Alageum electric акционерлік қоғамы мен Hilton Astana қонақүйіне алғыс айтамын, – деді Динара Шайжүнісова.
Салтанатты кеште дәстүр бойынша қолөнер туындылары, жәдігерлер аукционы өтті. Осы жылы лоттар арасында Әлия Назарбаева және фильмнің шығармашылық тобы ұсынған «Томирис» фильміндегі бас кейіпкердің төсбелгісі, қазақстандық суретші Алпысбай Қазығұловтың «Көшпенділер» картинасы, XIX ғасырдың соңы және XX ғасырдың ортасына тиесілі түскілемдер, ресейлік актер және кинорежиссер Данила Козловскийдің фильміне түсу, белгілі баскетболшы Дирк Вернер Новицкидің қолтаңбасы бар футболка мен кейс, Хабиб Нурмагомедовтың қолтаңбасы бар қолғап пен фото, Арнольд Шварцнеггердің қолтаңбасы бар футболка мен баскиім, танымал америкалық әнші Алиши Киздің қолтаңбасы бар нота кітабы және тағы басқа да құнды заттар аукционға қойылды.
Кеш қонақтары қор серіктестеріне бағалы жүлделер ұсынды. Оның ішінде Turkish Airlines ұсынған Парижге барып келуге екі билет, премиум-класс Invictus Astana фитнес-клубына абонементтер, Стамбұлдағы Hilton қонақүйінен орын, Jeff Tailor компаниясының сыйлық сертификаттары, «Эпл Якутские бриллианты» зергерлік салонынан сыйлықтардан ұтыс ойыны ойнатылды.
Centrasia Group компаниясының басшысы Алмас Құдайберген қайырымдылық шарасының болашақ ұрпақ үшін өте маңызды екенін атап өтті.
– Мұндай шараны өткізу, оны кеңінен насихаттау өте қажет. Себебі қоғамда қолдауға зәру жандар жетерлік. Мейірім, адамгершілік, сыйластық болған жерде қоғамдағы мүмкіндігі шектеулі жандарға деген сыңаржақ көзқарас өзгереді. Олар да қатарынан кем қалмай, білім алуына, спортпен айналысуына жағдай жасаймыз. Жаңадан жұмыс орындарын ашу арқылы жұмыссыздықты азайтып жатырмыз. Уақытылы салық төлеу арқылы қазына қаржысын толтыруға үлес қосып келеміз. Экономикадағы оңды өзгерістер, тұрақты даму – тек қана қарапайым халықтың тұрмысын жақсартуға үлкен үлес қосып жатқанына қуанамын, – деді Алмас Құдайберген.
Жыл өткен сайын қайырымдылыққа атсалысқандардың қатары көбейгені – қуанарлық жайт. «Әрбір бала мектепке лайық» жобасына қатысқан отбасыларға жақсылық, қуаныш сыйлап жатыр. Жоба жайында естіп, астанаға басқа қалалардан, тіпті шетелден көшіп келгендер де бар. Биыл қолдауға мұқтаж отбасы Ресейден Қазақстанға көшіп келді. Қазір бала Петропавлда оқиды. Былтыр жоба жұмысын алыс аймақтарда бастаған кезде балалары мектепке барып, арнайы мамандардан қажетті көмек алу үшін 4 отбасы Жаңаөзеннен Ақтау қаласына көшіп келген. Қолжетімді сапалы білім алу, ерекше күтімді қажет ететін балалар құқығын қорғау, мамандар даярлауға қол жеткізген. Ерекше айтып өтер жайт, «Жол жүру гранттары» жобасы аясында Ұлыбритания, Италия, Германия, БАӘ, Таиланд, Ресейде өтетін спорттық, ғылыми және шығармашылық сайыстарға қатысу үшін дарынды, ерекше күтімді қажет ететін жастарға 71 грант берілді.
Дәстүрлі салтанатты кеш қонақтары дебютанттардың биі, «Астана» эстрадалық-симфониялық оркестрінің өнері, опера әншілері Азат Мәлік пен Зарина Алтынбаева, халықаралық «Новая волна» байқауының финалисі Адам, «Голос» байқауының қатысушысы Мархаба Сәбидің өнерін тамашалады.