Жастар жылы аяқталды, бірақ жас ұрпақты қолдау жаңа қарқынмен жалғасады: Мемлекет басшысы «Жастар саясаты туралы» жаңа кешенді бағдарлама әзірлеуді жүктеді. Президент Қасым-Жомарт Тоқаев елордада Жастар жылының жабылу және Волонтер жылының басталу салтанатына қатысты.
Іс-шара Тәуелсіздік күні қарсаңында өткендіктен, Қ.Тоқаев азаттықтың мән-маңызына ерекше тоқтала кетті.
– Біз үшін бұдан асқан қастерлі әрі маңызды мереке жоқ! Тәуелсіздігімізді нығайтып, елімізді одан ары өркендету – қазіргі ұрпақтың қасиетті борышы. Біз сіздерге зор үміт артамыз. Мемлекетіміздің келешегі – өздеріңіз! Мен барша жастарды мақтан тұтамын, – деді Қасым-Жомарт Кемелұлы.
Ол Жастар жылын Елбасы бастамасымен өткізгенін еске салды.
– Жастардың жан-жақты дамуына жағдай жасау – Президент ретіндегі басты бір міндетім. Сондықтан осы мәселе әрдайым менің назарымда болады. Ұрпағын аялай білген халық іргелі жұртқа айналады. Біз халқымызды әлемге танытқан ең асыл қасиеттерді сіздердің бойларыңыздан көргіміз келеді, – деді Мемлекет басшысы.
Жастар жылында өскелең ұрпақты қолдау үшін көптеген жұмыс атқарылғаны айтылды. Нақтылай түссек, тұрғын үй, жұмыспен қамту, сапалы әрі қолжетімді білім беру шаралары қолға алынды. Үш мегаполисте жұмысшы жастарға жалдау құны өте арзан 9 мың пәтер беру шешімі қабылданды. 2019 жылы 5 мың азамат мемлекеттен грант алып, жас кәсіпкер атанды. Алдағы үш жыл ішінде олардың саны 30 мыңға дейін көбейеді. Бұдан бөлек, 10 мың жас бизнесмен шағын несие арқасында өз өндірісін кеңейтті.
«Дипломмен – ауылға» бағдарламасына жаңа серпін берілді. Ауылды өркендетуге үлес қосуға ынталы жастар 6 мыңнан астам жәрдемақы, баспана алу үшін 4 мыңға жуық несие иеленді. Құрылыс отрядтары жанданып, 2 мыңдай студент жұмыспен қамтылды.
«Президенттік жастар кадр резерві» жасақталуда. Оған енгендер болашақта жоғары лауазымға ұсынылады. Өйткені өз ісін жетік білетін майталман мамандардың жаңа буынын қалыптастыру міндеті тұр.
Биыл университет спартакиадалары қозғалысы қайта жаңғыртылды. Бұған қоса жас жазушылардың Әдебиет академиясы ашылмақ.
Ел Президенті жастарға қолдау көрсету үшін Үкімет алдына жаңа міндеттер қойды.
– Ең алдымен, бізге «Жастар саясаты туралы» жаңа кешенді бағдарлама керек деп санаймын. Онда заманауи жаһандық үрдістер мен жастардың сұраныстары жан-жақты ескерілуі тиіс. Жастар саясаты жөніндегі жалпы тұжырымдама 20 жыл бұрын әзірленген. Қазіргі уақытта осы салада түрлі бағыттағы бағдарлама өте көп. «Жасыл ел», «Дипломмен – ауылға», «Жастар практикасы», «Серпін» және басқасы. Олар елге керек екенін дәлелдеді. Алайда жас азаматтар оларды бір-бірінен айыра алмайды, ұсынатын мүмкіндіктері мен іске асыру тетіктерін түсінбей жаңылады. Ендеше, жастар саясатына кешенді көзқарас болуға тиіс, – деді Қ.Тоқаев.
Оның байламынша, жастардың барлық санатына арналған жаңа бағдарлама сапалы білім беру, жұмысқа тұрғызу, қолжетімді баспанамен қамту бағытындағы өзекті мәселелерді шешуге тиіс. Жастардың кәсіби біліктілігін арттыруға жағдай жасалуы қажет. Құжатта сондай-ақ жас буынға арналған тиімді әрі ашық әлеуметтік мүмкіндіктер көрсетілуі керек. Барлық елді мекендегі спорт және мәдениет нысандары жастарға қолжетімді болуы шарт.
Қазақстан Президенті жастар ұйымдары бірінші кезекте жас адамның мәселесімен айналысуы тиіс екенін нықтады. Оның айтуынша, бұл бірлестіктер жасампаздық танытпағасын, жас қазақстандықтар жауапсыз әрі деструктивті ағын-қозғалыстар ықпалына түседі.
Қ.Тоқаев жастар қозғалыстарының барлық шарасы көзбояушылық үшін өткізілмей, нақты нәтижеге бағдарлануы тиіс деді. Жас азаматтардың көкейкесті проблемасын іс жүзінде шешетін қоғамдық бастамалар мен жобалар қажет.
Мемлекет басшысы ажырасудың көбейгеніне алаңдаушылық білдірді.
– Өкінішке қарай, ажырасу фактілері осы саладағы түйткілді мәселенің біріне айналды. Бұған баса мән берілмей отыр. Халқымызда «Отан отбасынан басталады» деген қанатты сөз бар. Әрбір отбасын сақтау – Отанымыздың берік болуының кепілі. Жас шаңырақ бақыт бесігіне айналуы тиіс. Олардың әрқайсысына тұтастық пен татулықтың дәстүрін орнықтыруымыз керек. Зиялы қауым өкілдері мен ұстаздар жастар арасында түсіндіру жұмыстарын жүргізіп, отбасы құндылықтарын дәріптеуі қажет. Мұның мемлекет үшін маңызы өте зор. Жастарды тәрбиелеу ісінде ата-аналарға да зор жауапкершілік жүктеледі, – деді ол.
Қасым-Жомарт Тоқаев 2020 жылдың 1 қаңтарынан бакалавриат, магистратура және докторантура студенттері стипендиясын 25%-ға көтеру туралы шешімін жария етті. Оның игілігін 130 мыңдай адам көреді. Бұдан бөлек, келер жыл басында колледжде оқушы 100 мың адамның шәкіртақысы да 25%-ға өсіріледі.
Қазақстан Президенті осы күні Австралия елшісі Грейм Михан, Кипр елшісі Андреас Зинонос, Конго елшісі Давид Мадука және Мьянма елшісі Ко Ко Шейннен сенім грамоталарын қабылдады.