Еліміздің тағы бір қаласында «Сергек» орнатылып, өз қызметін бастады. ІІМ-нің түсіндіруінше, облыс орталығына айналған Түркістан қаласында халықпен бірге көліктің де саны күрт көбейген. Осыған орай көшелер кеңейтіліп, арнайы жаяу жүргіншілер жолағы, веложолдар салынды. Енді жол бойы соңғы үлгідегі бей- небақылау камераларымен жабдықталуда.
Бұл жобаның басты мақсаты ретінде «жол қозғалысы ережесінің бұзылуына жол бермеу, жол-көлік оқиғасының санын азайту» аталды. Оның аясында Түркістан қаласының көліктер көп жүретін орындарында 10 «Сергек» автоматты құрылғысы қойылып, олар 2021 жылдың 5 қаңтарынан бастап іске қосылды. Нақтырақ айтсақ, Тәуке хан көшесінде – 3, С.Қожанов көшесінде – 2, ал Байбұрт, Б.Саттарханов, Қазыбек би көшелерінде, Қызылорда тасжолы бойында, «Қазақстанға 30 жыл» даңғылына 1-еуден орнатылды. – Бұл құрылғылар қауіпсіздіктің жоғары деңгейін қамтамасыз ету және құқықбұзушылықтарды автоматты түрде фотобейнетіркеу үшін керек. «Сергек» камералары рұқсатты жылдамдықты арттыру, қызылға өту, жол белгілері мен жолақтарының талаптарын бұзу, рұқсат етілмеген жерде тоқтап тұру және автобус жолағымен жүру сияқты ереже бұзушылықтарды тіркеп, көлік иесіне өз бетінше айыппұл жазып отырады. Мәселен, осы «Сергек» жұмыс істеген 2 күннің ішінде жылдамдықты асыру бойынша 25 әкімшілік құқықбұзушылық анықталып, жүргізушілерге 500 мың теңгеге жуық айыппұл салынды, – дейді Түркістан облысының Әкімшілік полиция басқармасы бастығының орынбасары Ғалымжан Есімов. Жалпы, 2020 жылы жол-көлік оқиғалары салдарынан қаза тапқандар саны өткен жылмен салыстырғанда 46 пайызға азайған. Ал жарақат алғандар 115-тен 82-ге кеміген. Көрсеткіштердің төмендеуіне бейнебақылау камераларының да септігі тиюі тиіс.Ерік ЕРДЕНОВ