Елбасы – Nur Otan партиясының Төрағасы Нұрсұлтан Назарбаев 29 қарашада Орталық Азия мемлекет басшыларының консультативтік кеңесінде аймақтағы әр елден келген студенттерге Қазақстанның үздік университеттерінде білім алу үшін 10 грант бөлуді ұсынған болатын. Бұл бастамаға бірінші болып еліміздегі жетекші университеттің бірі – ҚазМЗУ үн қосты.
ҚазМЗУ басқарма төрағасы Талғат Нәрікбаев Қазақ мемлекеттік заң университетінде Өзбекстанның орта мектеп түлектеріне білім алуға және жатын орынға 10 гранттың бөлінетіндігін жария етті. Ол бұл туралы Scopus Award – 2019 сыйлығын табыстау шарасы аясында Өзбекстан премьер-министрінің орынбасары А.Абдухакимов пен Өзбекстанның халыққа білім беру министрі Ш.Шерматовпен кездесуінде айтты. Іс-шарадан соң ҚазМЗУ Ташкент мемлекеттік заң университетімен ынтымақтастық туралы меморандумға қол қойды.
– Бұл – оқытушылар мен студенттердің академиялық ұтқырлығы, сондай-ақ өзбек әріптестерімізге консультативтік, әдістемелік көмек көрсету туралы ортақ келісім. Тәуелсіздіктің 28 жылы ішінде Қазақстан шетелдік инвестицияларды тартудың үлкен тәжірибесіне ие болды, ол үшін Азаматтық кодекске айтарлықтай өзгертулер енгізілді, – деді Талғат Нәрікбаев.
Ол сонымен қатар Астана халықаралық қаржы орталығымен тығыз байланыста екенін және университет базасында Лондон заң университеттерінің бірінің филиалын ашқысы келетінін тілге тиек етті.
– Біз Елбасының ұсынысын дамытқымыз келеді. Сол мақсатта Түркіменстан елшісімен сол елдің студенттеріне грант бөлу туралы келіссөздер жүргіздік. Елші бұл бастаманы оң қабылдады және оны толық қолдайтынын жеткізді. Келер жылы біз Түркіменстанға барып, университетіміздің мүмкіндіктерімен таныстыруды жоспарлап отырмыз, – деп атап өтті Талғат Мақсұтұлы.
Әңгіме барысында мемлекеттік және ұлттық университеттердегі профессорлар мен оқытушылардың жалақысының төмендігі және жоғары оқу орындарындағы өзге де күрмеулі мәселелер айтылды.
Әбілмансұр ЖАСАН