Желтоқсанның 10 күні ел астанасы – Нұр-Сұлтан қаласында Мемлекет басшысы Қасым-Жомарт Тоқаевтың қатысуымен Жастар жылының жабылу және Волонтер жылының ашылу салтанаты өтті. Қазақстанның барлық аймағынан 500-ге жуық жас келіп қатысқан салтанатты шарада Қазақстан Президенті арнайы сөз сөйледі.
«Сіздермен Тәуелсіздік күні қарсаңында жүздесіп отырмыз. Біз үшін бұдан асқан қастерлі әрі маңызды мереке жоқ.Тәуелсіздігімізді нығайтып, елімізді одан ары өркендету – қазіргі ұрпақтың қасиетті борышы. Сондықтан біз сіздерге зор үміт артамыз. Мемлекетіміздің келешегі – өздеріңіз!» – деп сөз бастаған Қасым-Жомарт Кемелұлы өтіп бара жатқан жылдың мән-маңызы ерекше болғанын айтты. «Елбасы Нұрсұлтан Назарбаевтың бастамасымен барша ел болып Жастар жылын өткіздік. Бәріміз білімді әрі бәсекеге қабілетті ұрпақ тәрбиелеу ісіне айрықша мән беріп отырмыз», – деді ел Президенті.
Мемлекет басшысы еліміздегі бастамалардың барлығы жас буынның жарқын болашағы үшін қолға алынып отырғанын, бұл тұрғыда жастардың жан-жақты дамуына жағдай жасау Президент ретіндегі басты міндетінің бірі екенін атап өтті.
«Биыл біз «Президенттік кадр резервін» жасақтаймыз. Жүзден жүйрік, мыңнан тұлпар шыққан, бірнеше сынақтан өткен таңдаулы жас осы тізімге енеді. Бұған тек болашақта жоғары лауазымға ұсынылар үміткерлер тобы деп қарауға болмайды. Аталған жоба, ең алдымен жігерлі жастарды елге шын ниетімен адал қызмет етуге ынталандыруы тиіс. Өз ісін жетік білетін кәсіби мамандардың жаңа буынын қалыптастыру – басты міндет», – деп атап өтті Қ.Тоқаев жастардың алдында сөйлеген сөзінде.
Мемлекет басшысының айтуынша, биылғы Жастар жылында университет спартакиадаларының қозғалысы қайта жаңғыртылып, ұлттық спорт түрлерін қолдауға баса мән берілді. Сондай-ақ атап өтерлік жайт – осы жылы жас жазушылардың Әдебиет академиясын ашу үшін нақты жұмыстар атқарылып жатыр. «Әрине, ойға алған нәрсенің бәрін бірдей жүзеге асырдық деп айтуға болмас. Бірақ бұл жұмыстарды алдағы уақытта міндетті түрде жалғастырамыз. Мен Қазақстан жастары мемлекет дамуының негізгі мәселелері бойынша айқын азаматтық ұстанымға ие екеніне қуаныштымын және оны ашық білдіремін. Мемлекеттік және қоғамдық өмірдің кейбір өзекті мәселелері бойынша жастардың ұстанымын білдіруге ешқашан кедергі келтіруге болмайды», – деді Президент.
Осы орайда, Қ.Тоқаев алдағы кезеңде мемлекеттік органдар жастарға қолдау көрсету үшін бірқатар міндеттерге баса назар аударуы қажет екенін мәлімдеді. Мемлекет басшысы ең алдымен Қазақстанға «Жастар саясаты туралы жаңа кешенді бағдарлама керек деп санайтынын айтты. Ол бағдарламада қазіргі жаһандық үрдістер мен жастардың сұраныстары жан-жақты ескерілуі тиіс. «Жастар саясаты жөніндегі жалпы тұжырымдама 20 жыл бұрын әзірленген. Қазіргі уақытта осы салада түрлі бағыттағы бағдарламалар өте көп. Сондықтан жастар саясатына кешенді көзқарас керек. Жаңа бағдарлама арқылы жастарға сапалы білім беру, жұмысқа тұру, қолжетімді баспанамен қамтамасыз ету тетіктерін ұсыну керек. Құжатта жас буынға арналған тиімді әрі ашық әлеуметтік мүмкіндіктер көрсетулі қажет. Үкімет келесі жылы осы бағдарламаны дайындап, оның негізінде 2021 жылы заң жобасын әзірлеуі тиіс», – деп тапсырды Қ.Тоқаев.
Қасым-Жомарт Кемелұлы жастар саясаты туралы айтқанда, отбасы институтын ұмытпау қажет екеніне тоқталды. Ол дәстүрімізді, ұлттық құндылығымызды және ұрпақ сабақтастығын сақтау үшін өте маңызды. Өкінішке қарай, қазіргі таңда ажырасу фактілері осы саладағы түйткілді мәселеге айналып отыр. «Халқымызда «Отан – отбасынан басталады» деген қанатты сөз бар. Әрбір отбасын сақтау – Отанымыздың берік болуының кепілі. Жас шаңырақ бақыт бесігіне айналуы тиіс. Олардың әрқайсысына тұтастық пен татулықтың дәстүрін орнықтыруымыз керек. Мұның мемлекет үшін маңызы өте зор», – деді Қазақстан Президенті.
Бұл тұрғыда жастарды тәрбиелеу ісінде ата-аналарға да зор жауапкершілік жүктелмек. Өйткені елімізде 14 жасқа дейінгі балалардың саны соңғы 5 жыл ішінде шамамен 1 миллионға көбейеді. Қазір олардың саны 5 милионнан асады. Демек жасөспірімдерге білім мен тәрбие беріп, азамат етіп қалыптастыру мемлекет пен қоғамның негізгі парызы.
Ел жастарымен жүздескен салтанатты басқосуда Мемлекет басшысы 2020 жыл Қазақстанда «Еріктілер жылы» деп жариялануының маңызына айрықша тоқталды. «Ерікті болу, волонтер атану – бұл Батыста пайда болған қозғалыс. Ерікті болып қызмет етудің мәні – жақсы ниет пен бір нәрсе жасау. Бұл біздің ұлттық дәстүрлеріміз бен құндылықтарымызға сәйкес келетіндігі бәрімізге белгілі. Ерікті болу азаматтардың жауапкершілігі мен әлемді жақсы жағына өзгертуге дайын екендігінің көрсеткіші», – деп атап өтті Қасым-Жомарт Кемелұлы.
Президент келесі жылдан бастап корпоративті волонтерлікті дамыту қажет екенін баса айтты. Мемлекет басшысы жұмыс аптасы аясында бірнеше сағат бойы ірі компаниялардың қызметкерлері қоғамға тегін көмек бере алатынын мысалға келтірді. Бұл тұрғыда мемлекеттік аппарат пен ұлттық компаниялар корпоративті еріктілерді енгізуден бастау алады.
«Волонтер жылы баршамызға, әсіресе жастарға үлкен жауапкершілік жүктейді.Сондықтан сіздерді осы игі бастамаға белсенді атсалысуға шақырамын. Жастарымыз мұқтаж жандарға көмек қолын созуға әрдайым дайын болуы керек. Дана халқымыз «Жұмыла көтерген жүк жеңіл» деген. Қайырымдылық пен мейірімділік – қанымызға сіңген қасиет. Қазақта асар жасап, бір-біріне көмектесіп, қолдау көрсету дәстүрі бар. Оның волонтерлікпен үндесетіні сөзсіз. Сондықтан алдағы жылы сол дәстүрді заманға сай қайта жаңғыртуымыз қажет», – деді Президент жастарға қарата айтқан сөзінде.
Бұл істе белсенді жастарға зор сенім артылып отырғанын жеткізген Мемлекет басшысы елге қызмет ету тек білімді ғана емес, намысты да талап ететінін салтанатты басқосуға жиналған жастардың есіне салды.
«Жас ұрпақтың ар-намысы жоғары болса, мемлекетіміздің мәртебесі биік болады. Қазіргі жастар Бауыржан Момышұлының «Отан үшін отқа түс – күймейсің» деген сөзін берік ұстануы керек. Өйткені Тәуелсіз Қазақстанның тұғырлы тірегі, үкілі үміті, берік қалқаны – өздеріңіз.
Қайратты жастарымыз көп болса, мемлекетіміздің болашағы баянды болады деп сенемін», – деп аяқтады сөзін Қасым-Жомарт Тоқаев.