Жалпы, биылғы сайлау жылдағыдан өзгеше болып тұр. Дегенмен осы жолғы партиялық сайлауды қолдаймын. Неге дейсіз бе?! Халыққа, қоғамға жалғыз, жалқы болмай, бір үлкен ұйым, қоғам болып, бірігіп қызмет жасағаны тиімді болады деп ойлаймын. Жалғыздың үні шықпайды. Оны атам қазақ ертеде-ақ айтып кеткен. Ал партияластар болып, өз партиясының сайлауалды бағдарламаларында айтылған міндеттерді орындауға жұмыла кіріссе, елге пайдасы көбірек тимек.
Алайда мені кейбір партиялардың кандидаттары аз болғаны қынжылтты. Қазақстандық партия құрған соң оның пікірлес адамдары да көп болуы керек емес пе?! Сонда ғана алға қойған мақсатқа жетеді. Барлық сайлауға қатысып, дауыс беріп келемін. Бұл жолы да Шымкент қаласындағы №10 сайлау учаскесіне барып, өз таңдауымды жасадым. Бүгінде азаматтардың саяси көзқарасы қалыптасқан. Олардың белсенді қатысып жатқанына көз жеткіздік. Сайлау өз деңгейінде тыныш, заң талабын сақтай отырып өтті. Бүгін жеңіске жеткен партиялардың статистикасы болжамданып айтылып жатыр. Барлығының мүддесі – елдің жарқын болашағын ойлау. Олардың әрқайсысының бағдарламасында елімізді көркейту, халықтың тұрмыстық жағдайын жақсарту, экономикамызды дамыту мүддесі жатыр. Сондықтан Қазақстанды өркентуде бірлесе ынтымақ және бірлікті ұстансақ дейміз.Исмайылбек ШАЛАБАЕВ, Қазақстанның құрметті қаржыгері, еңбек ардагері Шымкент қаласы