Осыдан төрт жыл бұрын атышулы Тоқтар Төлешовке қатысты сотқа нүкте қойылып, «сыра королі» 21 жылға бас бостандығынан айырылған болатын. Оның мемлекет алдындағы 1 млрд 300 млн теңге қарызы есебінен бүкіл дүние-мүлкі тәркіленуі тиіс деп сот шешім шығарған-ды.
Алайда атқару парағын алған сот орындаушылары 4 жыл бұрынғы осынау сот шешімін әлі күнге дейін орындай алмай келеді. Себебі дүние-мүлікке таласушылар көбейді. Шымкентте жыл сайын Төлешовке қатысты жаңа деректермен сот отырыстары өтіп тұрады. Өткен жылдың өзінде оның жұбайлары мен қыздары мекемеден өздерінің отбасына тиесілі болған қордаланып қалған жалақыларын ала алмай отырмыз деп сотқа арызданса, артынша жазасын өтеп отырған сотталушының өзі «Дархан Group» ЖШС-індегі жалпы жиналыс шешімдерін жарамсыз деп тану туралы талап-арыз жолдады. Себебі серіктестікте өзінің қатысуынсыз жалпы жиналыс өтіп, дүние-мүлік үшінші тарапқа сатылып кеткен. Бұл кезде сот заңға сәйкес талап қоюшы жалпы отырыстың шешіміне алты ай ішінде шағым жасау мерзімін өткізіп алғандықтан, талап-арызды қанағаттандырудан бас тартқан болатын. Енді, міне жуырда Шымкент қалалық Еңбекші аудандық прокуратурасы Еңбекші аудандық сотына осы жағдайға ұқсас талап-арыз тастады. Прокуратура «Дархан Group» ЖШС-ін екінші мекемеге беру туралы хаттаманы және хаттама негізіндегі келісімшартты заңсыз деп тануды сұрап отыр. Еңбекші аудандық сотына өткен жылдың соңғы күндері келіп түскен талап-арыз бойынша соттың алғашқы отырысы 8 қаңтар күні өтті. Сотқа төрағалық етуші Еңбекші аудандық сотының судьясы Қ.Ізбасаров осыдан екі жыл бұрын Төлешовтің мемлекет алдындағы қарызын өтеуі үшін сот «Дархан Group» ЖШС-нің барлық мүлкі мемлекеттің балансына аударылсын деген ұйғарым шығарғанын айтады. Алайда бұл ұйғарымға қарамастан серіктестікте жалпы жиналыс өтіп, мекемені сатып жіберген. Прокуратура мұны мемлекетке бермеудің қитұрқы әрекеті деп бағалап отыр. – «Дархан Group» ЖШС-нің Төлешовтен басқа тағы да құрылтайшысы бар. Ол мүлікті қарыз есебінен басқа біреуге беріп отыр. Ал беріп отырған адамы құрылтайшының өзі. Мекеме құрылтайшыдан 4 млн теңге көлемінде жалақы қарыз екен. Яғни, құрылтайшы 4 млн теңгені өзімнің пайдам деп есептеп, мекемені толық өзіне аударып, жекешелендіреді. Одан кейін 200 млн теңгеге үшінші тұлғаға сатады. Мүлікте серіктестік меншігіндегі «Арман» балабақшасы мен Сарыағаш ауданындағы жер учаскесі бар. Мұның барлығы да серіктестіктің жалпы жиналысында шешіліп, хаттама түзілген. Прокуратура осы хаттаманы заңсыз деп тануды сұрап отыр. Бүгінде аталған серіктестікте мүлік қалмаған. Енді біз мұның заңдылығын қарайтын боламыз. Алғашқы сот отырысы енді басталды,– дейді судья Қайрат Ізбасаров. Бүгінде сот орындаушыда серіктестіктің мүлкі мемлекетке аударылу қажеттігі жөнінде атқару құжаты бар. Алайда мүлік мемлекетке өтудің орнына басқа тұлғаға сатылып кетіп отыр. Иә, мұның барлығы да Төлешов тергеуде жүргенде сыртынан істелген әрекеттер. Екінші құрылтайшы одан ешқандай да келісім алмаған. Демек, мұнда бұрынғы «сыра королінің» қолтаңбасы бар ма, жоқ па әзірге белгісіз. Дегенмен прокуратураның мемлекет мүддесін қорғап, сатылып кеткен мүлікті даулап отырғаны көңілге қуаныш ұялатады.Назгүл НАЗАРБЕК, Шымкент қаласы