Көкшетауда қар тазалап үлгермей жатыр

Бүгін түнде Көкшетауда қа­лың қар түсті. Табиғаттың то­сын «сыйы» облыс орта­лығын­дағы коммуналдық сала қызметкерлерін әбі­­гер­ге түсірген. Қазіргі уақытта қар тазалаумен «Тазалық» және «Зерен плюс 2016» жауап­кершілігі шектеулі серік­тестіктері айна­лысып жа­тыр.

Тазарту жұмыстары таң қылаң бере басталып кеткен. «Тазалық» серіктес­тігіне тиесілі 38 бірлік техника мен 55 жұ­мысшы, «Зерен плюс 2016» серіктес­тігінің 45 жұмысшысы қар тазалау жұ­мыс­тарына кіріскен. «Қаланың коммуналдық қыз­мет­тері тәулік бойы қала көше­лерін қардан тазартады. Жолдарды тегістеу, сыпыру және тазалау бойынша жұмыстар жүргізілуде. Қардың қалың түсуіне бай­ланыс­ты барлық жүргізушілер мен жаяу жүргіншілерді жолда барынша сақ болуға шақырамыз», – делінген облыс­тық әкімдіктің ресми хабар­ламасында. «Тазалық» коммуналдық қыз­метінің жұмысшылары орталық саябақтарды, жаяу жүргіншілер жолдарын тазартумен айналысып жатыр. «Біз таңғы 7-ден бастап жұ­мысқа кірісудеміз. Бізге облыстық әкімдік пен әкімшілік ғимарат­тардың алды және орталық алаң мен осы аумақтағы жаяу жүр­гін­шілер жолдарын тазалау тап­сырылды. Қазір, міне 11 жұмыс­шы, екі техника жұмыс істеп жатыр», – дейді «Тазалық» серік­тестігінің жұмысшысы Беркімбай Оразин. Қалалық әкімдіктің мәлім­етінше, көпқабатты үйлердің аула­сын тазартуға сол аумақ­тардағы ПИК жауапты. Бұған дейін Қазгидромет РМК-ның Ақмола облыстық филиалы өңір­де дауылды ескерту жария­ланғанын хабарлаған еді. Онда 2021 жылдың 12 қаң­тарында облыстың басым бө­лігінде қалың қар жауатыны ай­тылды.

Ал «Қазавтожол» жауап­кершілігі шек­теулі серіктестігінің мәліметі бойынша Ақмола облысында ауа райының нашар­лауына байланысты (қатты қар, боран, нашар көріну, қатты жел) «Көкшетау-Рузаевка» а/ж 0-61 км (Көкшетау қ.СКО ш.), «Көкшетау-Омбы» а/ж 0-51 км (Көкшетау қ. СҚО ш.), Макинск-Ақсу-Торғай» а/ж 0-240 км (Макинск қ-Торғай қ.), «Нұр-Сұлтан-Петропавл» а/ж 304-341 км (Көкшетау қ. СҚО ш.) респуб­ликалық маңызы бар автожолы жабылды.

Абзал АЛПЫСБАЙҰЛЫ, Ақмола облысы