Өзінен кіші қызға ғашық болғаны үшін абақтыда отырған 17 жастағы бозбала бостандыққа шықты

Бұл туралы КТК хабарлады. Апелляциялық алқа 17 жастағы Нұрасхан Тынымжановтың жазасын жеңілдетті.

Ақтөбе қаласының тұрғыны Нұрасхан Тынымжанов: «Алдымнан ата-анам, адвокатым қарсы алды. Соларға көп рақмет. Халқыма көп рақмет! Алдағы жоспарым – сол қызға үйлену, жұмыс істеп, отбасын асырау», – дейді.

Бірнеше ай қамауда болған Нұрасханның қуанышында шек жоқ. Анасы мен әжесі де баласының үйіне оралғанына сене алар емес. Сот бозбаланы абақтыдан босату туралы үкім шығарған. Апелляциялық шағымды қараған судьялар оның кәмелетке толмағанын, жәбірленушінің кешірім бергенін ескеріпті. Енді бозбала сүйіктісімен жақында отау құрмақшы. Лицейде оқитын Нұрасхан Тынымжановты қалалық сот 16 жасқа толмаған қызбен жақындасқаны үшін үш жылға бас бостандығынан айырған.

Бірақ шешімге қоғам қарсы шығып, бозбаланы босату үшін Президенттен араша сұрады. Енді облыстағылар абақтыдан шығаруды жөн санаған.