«Алтын домбыраны» Рүстем Қайыртайұлы иеленді
«Алтын домбыраны» Рүстем Қайыртайұлы иеленді

Оралда «Алтын домбыра» иегері анықталды, - деп хабарлады «Қазақпарат».

Белгілі ақын, халықаралық айтыс ақындары мен жыршы-термешілер одағының басқарма төрағасы Жүрсін Ерман жүргізген доданың финалында он ақын өнер көрсетті. Сахнаға бірінші болып шыққан қарағандылық Өміржан Көпбосынов алматылық Қанат Мырзаханнан басым түсті. Батысқазақстандық Жансая Мусина түбі семейлік, қазір Алматыда тұратын Рүстем Қайыртайға жол берді. 

Тағы бір алматылық Қазірет Бердіхан қарсыласы, павлодарлық Аспанбек Шұғатаевтан гөрі жоғары балл алды. «Алтын домбыраның» екі мәрте иегері, қызылордалық Мұхтар Ниязов батысқазақстандық Бауыржан Ширмединұлының алдын орап кетті.

 Айтыстың ақтаңгері, Арқалық қаласының өкілі Айбек Қалиев нұрсұлтандық Әсем Ережеқызын жеңді. 

Осы топтың ортасынан суырылып, алға шыққан Мұхтар Ниязов пен Рүстем Қайыртайұлы суперфиналда күш сынасты. 

Қос құрдас елдік пен достықтың туын жоғары көтере білді. Қазылар алқасының шешімімен «Алтын домбырамен» бірге бас жүлде (4 млн теңге) Рүстем Қайыртайұлына берілді. Мұхтар Ниязов бірінші жүлдеге (2 млн теңге) қоса «Айтыстың ақтаңгері» атағына ие болды. 

Жансая Мусина мен Қазірет Бердіхан екінші (1 млн теңгеден), Айбек Қалиев пен Өміржан Көпбосынов үшінші (700 мың теңгеден) орынға көтерілсе, Аспанбек Шұғатаев, Әсем Ережеқызы, Қанат Мырзаханға арнайы жүлде (350 мың теңгеден) берілді. 

Айтыс меценаты Дулат Тастекеев белгілеген бір жылдық стипендия (2,4 млн теңге) Бауыржан Ширмединұлына бұйырды. Сондай-ақ кәсіпкер қарағандылық Дидар Қамиевке ат мінгізді. Басқа қатысушыларға ынталандыру сыйлықтары тапсырылды.