Шағын және орта бизнес тұншығып жатыр, проблеманы шешуге банктер қауқарсыз — Дариға Назарбаева
Шағын және орта бизнес тұншығып жатыр, проблеманы шешуге  банктер қауқарсыз — Дариға Назарбаева

Сенаттың отырысында отандық банктер мен несие ұйымдарының жайы талқыланды.

«Спутник Қазақстанның» жазуынша, Сенат төрайымы Дариға Назарбаева отандық банктердің проблемасын көтерді. Сенаттың бүгінгі отырысында депутаттар «Еуразиялық экономикалық одаққа мүше мемлекеттердің қаржы нарығы саласындағы заңнамасын үйлестіру туралы келісімді ратификациялау туралы» заң жобасын мақұлдады.

Жиында сенаторлар ортақ қаржы нарығында отандық банктердің қиындыққа тап болатынын да талқылады. Өйткені, еліміздің қаржы ұйымдары әлі күнге дейін мемлекеттің көмегіне зәру. Халықаралық қаржы ұйымдары техникалық жағынан мықты және заманауи қаржы құралдарын қолданады. Мұндай бәсекеге төтеп беру оңай емес. 

«Жалпы, бәсекеден қорықпау қажет. Бүгінде «шетелдік банктер келіп, отандық банктерді басып алады» деген әңгіме өз банктерімізден шығып отыр. Себебі, олар өз позицияларын жоғалтып аламыз деп қорқады. Бірақ бүгінде қаржы саласында проблема бар. Арзан ақша алуға мүмкіндік жоқ. Соның салдарынан шағын және орта бизнес тұншығып жатыр. Ал біздің банктер ол міндетті шешуге қауқарсыз», — деді Назарбаева.

Оның айтуынша, отандық банктер басқа қаржы ұйымдарымен бәсекеге түссе, өз шарттарын өзгертуге мәжбүр болады. Бұл – нарық заманының талабы.

«Мықты бәсекелестік болса, отандық банктер өз кемшіліктерінен құтылады. Ішкі әкімшілендіру жүйесін ретке келтіреді. Ол жерде де проблема бар», — деді Назарбаева.