Қызылордада сайлау нәтижесін қолдау мақсатында облыстық «Jas Otan» Жастар қанатының ұйымдастыруымен облыстық мәслихат депутатымен кездесу өтті.
«Jas Otan Cases» деп аталып, TED – форматында өткен шараға «Сыр үміті» жастар сыйлығының иегері, кәсіпкер, Қызылорда облыстық мәслиxатының депутаты Нұрболат Ибраев қатысты. Облыстық мәслихаттың VII шақырылымына «Nur Otan» партиясы атынан депутат болып сайланған халық қалаулысы ең алдымен биылғы сайлаудың ерекшелігіне тоқталып, сайлауалды үгіт-насихат кезінде жүргізген жұмыстарын, ондағы қызық оқиғаларын әңгімеледі. Жастарға кәсіпкерлікке қатысты мотивация беретін Case-термен бөлісті. – Бұған дейін қалалық мәслихаттың VI шақырылымында депутат болдым. Ол кезде әр үміткер сайлаушылардың өзіне дауысын жинау үшін жұмыс істеді. Арнайы сайлауалды бағдарлама әзірлеп, халық алдында сол бағдарламамызды қалай жүзеге асыратынымызды көрсетуге тырыстық. Өздеріңіз білесіздер, биылғы сайлау партиялық тізім арқылы жүргізілді. Мен «Nur Otan» партиясының праймеризіне қатысып, өзгелермен сынға түстім. Ашық, ІІІ кезеңде ұйымдастырылған праймеризде партияластарымның қолдауымен алғашқылардың бірі болып дауыс жинадым. Елімізде алғаш рет жалпы республикалық деңгейде ұйымдастырылған бұл праймериз маған өзімді жан-жақты көрсетуге септігін тигізді. Соның нәтижесінде партиялық тізімге ілігіп, партиялар арасында ұйымдастырылған саяси додада халқымыздың «Nur Otan» партиясына деген сенімі аясында мәслихаттардан ең көп мандатқа біздің партиямыз ие болды. Бүгінгі менің жеңісім, халықтың партияға деген сенімі деп айтар едім, – деді Нұрболат Ибраев. Кездесуде жастар кеш қонағына өздерін қызықтырған мәселелеріне қатысты сұрақтарын қойды. Мәселен, «бұған дейінгі депуаттық қызметте берген уәделеріңізді қанша пайызға орындадыңыз?», «депутат болу сіз үшін мақтаныш па, мансап па?» деген сауалдарға Нұболат кідірместен жауап берді. – Депутат болу – бұл мақтаныш, мансап, атақ емес, керісінше өзіңе үлкен жауапкершілік жүктеу. Себебі бізді халық өзі таңдады. Халық – құдайдың бір аты демей ме? Демек, сайлаушылардың алдындағы уәдені орындау үшін біз аянбай еңбек етуіміз керек. Бұған дейінгі уәделерімді мен 60 пайызға орындадым деп есептеймін. Оның шын бағасын сайлаушылар, халық өзі береді, – деді халық қалаулысы. Жасынан еңбекке құштар болып өскен кейіпкер бүгінде кәсібінің нәсібін көріп отыр. Ол жастарға мемлекет, партия тарапынан кәсіпкерлікті қолдауға бағытталған нақты шаралар туралы айтып, бизнеспен айналысуға кеңес берді.Әбілмансұр ЖАСАН