«НеМолчи KZ» қорының басшысы Дина Таңсәрі ел Президентіне үндеу жолдап, «Тұрмыстық зорлық-зомбылыққа қарсы іс-қимыл туралы» заң жобасына қарсы шыққандардың қызметіне сараптамалық баға беруді сұрады.
«Біздің қорымыз бен басқа да сарапшылар туралы негативтер көп. Зорлық-зомбылық құрбандарына мүлде көмектесіп көрмеген адамдар жалған ақпарат таратып, өздерін сарапшылар деп атап, қазақстандықтарды адастырып жатыр. Олар заңда жоқ нәрселерді айтып, бүкіл ақпараттық алаңды сол жалған нәрселермен толтыруда. Ал Парламент пен жұмыс тобының мүшелері үнсіз отыр», – дейді Таңсәрі.
Оның айтуынша, былтыр қазан айынан бастап қор еріктілері Парламентті, жұмыс тобының мүшелерін, Бас прокуратура мен ІІМ өкілдерін түсіндіру жұмыстарын жүргізуге шақырған.
«Өз еліне адал қызмет етіп жүрген адамдар ретінде Бас прокуратурадан жала жабу туралы сараптамалық қорытындыны халыққа хабарлауды талап етеміз. Пайыздық қатынаста олар таратқан ақпараттардың қаншасы рас, қаншасы жалған екенін айтсын», – деді қор жетекшісі.
Дина Таңсәрінің дерегіне сүйенсек, қордың заңды қолдау жөніндегі петициясына 90 мың қазақстандық қол қойған, ал қарсы топтың петициясын 20 мың адам қуаттаған.
Жақында Мемлекет басшысы халық арасындағы қызу талқылауға байланысты «Тұрмыстық зорлық-зомбылық туралы» заң жобасын қайта қарауды тапсырды. Одан кейін Парламент Мәжілісі Әлеуметтік-мәдени даму комитетінің төрағасы Жәмилә Нұрманбетова «Тұрмыстық зорлық-зомбылық туралы» заң жобасын кері қайтарып алуды және жобаны сарапшылармен, белсенділермен талқылауды ұсынды.
Бірқатар белсенді мен адвокаттар жаңа заң жобасына наразы. Әсіресе, олар физикалық, психологиялық және экономикалық зорлық-зомбылық сияқты тұжырымдар «заңсыз» және «Қылмыстық кодекске қайшы» деген уәждерін алға тартқан.
Ерсайын БАҒДАТ
