«Nur Otan» партиясы Қарағанды облыстық филиалы жанындағы Miras аймақтық кеңесінің отырысы өтті. Оған қоғамдық кеңес төрағасы Бекзат Алтынбеков және кеңес мүшелері мен зиялы қауым өкілдері, облыстық филиалдардың қызметкерлері, Мәдениет және тілдерді дамыту, Ішкі саясат басқармасының өкілдері, облыстық «Jas Otan» Жастар қанатының мүшелері қатысты.
Кеңес төрағасы 2021 жылдың 10 қаңтарында өткен Парламент Мәжілісі және мәслихаттары депутаттарының кезекті сайлауында «Nur Otan» партиясының 71,09 пайыз дауыспен жеңіске жетуі халықтың партияға сенім артатынына айғақ екенін атап өтті. Ол сонымен қатар сайлау науқаны кезінде үгіт-насихат жұмыстарына қатысып, партияға сеніп, дауыс беруге шақырған өнер майталмандарына алғысын білдірді. Отырыс кезінде Miras аймақтық қоғамдық кеңесі мүшелері сайлау қорытындылары туралы пікірлерін білдіріп, сайлау ашық және әділ өткенін айтты. Сондай-ақ жиынға қатысушылар саяси сахнаға қадам басқан, жаңадан сайланған Мәжіліс және мәслихат депутаттарын қолдайтынын және олардың халыққа етене жақын болып, қоғамдағы хал-ахуалды шешуде тиімді әрі оң шешім қабылдайтынына сенетінін жеткізді. Miras аймақтық қоғамдық кеңесінің 2021 жылы аталып өтетін іс-шараларына ұсыныстар енгізу үшін кеңес мүшелерінің пікірі тыңдалды. Сөз соңында Бекзат Алтынбеков кеңес жұмысына пікірлері мен ұсыныстарын айтып, белсене қатысқан кеңес мүшелеріне алғысын білдіріп, сәттілік тілеп, отырысты тәмамдады.Әбілмансұр ЖАСАН