«Jas Оtan» Жастар қанаты Ақтөбе облыстық филиалының төрағасы Асылжан Бүркіталин жаңа қызметке тағайындалды. Ол енді «Jas Оtan» Жастар қанаты төрағасының орынбасары қызметін атқарады.
Жасотандықтардың жаңа төрағасы мен орынбасарын партия Төрағасының Бірінші орынбасары Бауыржан Байбек бейнебайланыс арқылы өткен «Nur Otan» партиясы жанындағы «Jas Оtan» Жастар қанаты орталық кеңесінің отырысында таныстырды.
Асылжан Бүркіталин 1993 жылы Хромтау ауданында дүниеге келген. 2010 жылы Бөгетсай ауылындағы орта мектебін үздік аяқтап, 2014 жылы Ақтөбе мемлекеттік педагогикалық институтындағы оқуын қызыл дипломмен бітірген.
2012 жылдан бастап №8 орта мектебінде және дарынды балаларға арналған қазақ-түрік лицейінде мұғалім болып қызмет атқарды. 2014-2015 жылдары жергілікті «Қазақстан Ақтөбе» және «Нұр» телеарналарында тілші болды. 2016 жылдан бері «Jas Otan» Жастар қанаты Ақтөбе облыстық филиалы төрағасы қызметін атқарды. Осы кезге дейін партияның қолдауымен мүмкіндігі шектеулі жандар мен аз қамтылған отбасыларға көмек ұйымдастырды. Әсіресе, коронавирус пандемиясына қарсы күресте шынайы жанқияр жанашырлығымен еңбек етті.
Әбілмансұр ЖАСАН
