Адам өлімі оқиғасы мен оған қатысты болжамдардың әлеуметтік желіде жарияланып жататынына халық та үйренген. Сондай жағдайдан Атырау да айналып өтпеді. Бірер күннен бері Махамбет ауданы Таңдай ауылында өз нағашысын өлтіріп, денесін үйінің сарайында ұстаған мұғалім туралы ақпарат тарап жатыр.
Әлеуметтік желіде тараған деректерге сүйенсек, әйелдің үстінен, ауласы мен үйінен қолқаны қабатын иіс шығып, күмән тудырған. Полиция қызметкерлері оны денені бөлшектеп, сөмкеге салып қойған жерінен ұстаған. Құзырлы органның айтуы бойынша, Махамбет ауданы Таңдай ауылында 82 жастағы ер-азаматтың денесі табылған. «Сот-медициналық сараптама тағайындалды. Қазіргі таңда сотқа дейінгі тергеу-тексеру амалдары жүргізілуде», – деп хабарлады облыстық полиция департаментінің баспасөз қызметі. Құзырлы орган әлеуметтік желідегі ақпаратқа қатысты ештеңе айтпады. Қария кісі қолынан о дүниелік болды ма, әлде басқалай жағдай өліміне себеп болды ма, оны тек сот-медициналық сараптама анықтаған соң ғана мәлім болатыны және ақпарат берілетіні айтылды.Тұрсын ЖҰМАБЕКҚЫЗЫ, Атырау облысы