Дариға Назарбаеваның төрағалығымен болған Сенаттың жылжабар отырысы қызу өтті. Жоғарғы палата депутаттары күн тәртібіне шығарылған 11 мәселені қарады. Ата заңда берілген құзырларына сәйкес, сенаторлар Жоғарғы соттың бірнеше судьясын отставкаға жіберіп, жаңа судьяларын сайлады.
Қорытынды сөзінде палата төрағасы Д.Назарбаева Сенат қызметі биыл мазмұнды оқиғаларға толы болғанына назар аудартты.
– Көп жұмыс жасалды. Соңғы 2 ай ішінде Мемлекет басшысы Қ.Тоқаевтың сайлауалды тұғырнамасын және Жолдауын жүзеге асыруға бағытталған 30 маңызды заң қабылдадық. Президент ұсынған «Халық үніне құлақ асатын мемлекет» қағидасын ұстана отырып, «Мәслихат» порталында сенаторлар мен жергілікті мәслихаттар арасында тәжірибе мен пікір алмасуға арналған жұмыс алаңын құрдық. Енді аймақтардағы жағдайды жақсырақ түсініп, жаңа заң жобаларының өзектілігін олардан тікелей біле аламыз, – деді спикер.
Оның байламынша, палата жанындағы екі жаңа кеңестің жұмысы ұрпақтар сабақтастығын жолға қоймақ: жақында Сенаторлар кеңесі құрылды, оның аясында ұзақ жылдар бойы сенатор болған белгілі тұлғалар қазіргі әріптестерімен өздерінің құнды тәжірибесін және ақылын бөліседі. Ал жуырда іске кірісетін Жастар кеңесі «жас мемлекетіміздің болашақ жетістіктерінің дауысына» айналуы тиіс.
– Құрметті депутаттар! 2020 жылдың басында аймақтарға іссапарға шығасыздар. Сіздерге қазақстандықтармен кездесіп, олардың ұсыныстарын тыңдап, жағдайларын біліп, мүдделері мен үміттерін қолдау жүктелген. Міндеттеріңіз – халыққа Парламент қабылдаған соңғы заңдар күшіне енгенде, яғни 1 қаңтардан бастап қандай оң өзгерістер болатынын қарапайым тілде түсіндіру. Бұл әлеуметтік төлемдер мен мемлекеттік арнайы жәрдемақыларға, кепілді әлеуметтік пакеттер мен көмектерге қатысты. Жаңа жылдан бастап міндетті медициналық сақтандыру да іске қосылады, – деді Дариға Нұрсұлтанқызы.
Ол әріптестерінен іссапар кезінде бірнеше маңызды мәселеге баса мән беруді өтінді. Біріншіден, сенаторлар тірек және спутникті елді мекендер тізіміне кірмей қалған ауылдар ахуалын білуі, тұрғындар өмірімен танысуы, келешегінен қаншалықты хабардар екенін анықтауы қажет. Екіншіден, кепілді әлеуметтік топтамаға (КӘТ) сәйкес, әлеуметтік жағдайы төмен отбасы балаларына азық-түлік, жөргек, киім-кешек, оқу құралдарын беру қарастырылған. Жергілікті билік оны қамтамасыз етуге қаншалықты дайын? Депутаттар осыны да айқындауы керек.
Үшіншіден, ауылдағы медицинаға қолжетімділік пен бұл қызметтердің сапасы алаңдатады. Барлық адам медициналық ұйымдарға тіркелген бе? Оларға нақты қандай көмек көрсетіледі? Сенаторлар осы сауалдарға да жауап іздемек. Төртіншіден, жергілікті өзін-өзі басқару органдары іс жүзінде қалай жұмыс істеуде, жеке бюджетті басқаруға қаншалықты дайын? Осыны да зерттеуі керек.
Сөз соңында Д.Назарбаева әріптестерін келе жатқан 2020 жылмен құттықтап, қызметте табыс, елге амандық, келешекке кемелдік тіледі.
Елдос СЕНБАЙ