Қазақстанда ана өлімі күрт көбейді. Бұған басты себеп – жаз мезгілінде өршіген коронавирус инфекциясы. Бұл туралы Денсаулық сақтау вице-министрі Ажар Ғиният айтты.
Денсаулық сақтау вице-министрі Ақтөбе облысында ана өлімінің санын азайту бойынша республикалық отырыс өткізді. Ол Президент Қасым-Жомарт Тоқаевтың «2020 жылы ана өлімі 2,8 есе өсті» деген сөзіне қатысты пікір білдірді. Өткен жылы Қазақстанда 156 ана қайтыс болған. «Ана өлімі былтыр жаз мезгілінде күрт көбейді және ол коронавирус инфекциясына байланысты. Пандемия салдарынан денсаулық сақтау саласына қиын болды. Ең бірінші кезекте әйел адамдарға көмек көрсетуге арналған жедел жәрдем қызметі зардап шекті», – деді Ажар Ғиният. Оның айтуынша, 2020 жылы биыл бала туу саны былтырмен салыстырғанда 22 298-ге көп және 21 147 жүкті әйел бар. «Мемлекет басшысы аймақ әкімдерімен бірлесіп денсаулық саласындағы барлық мекемені түгендеуді, басты назарға босандыру және реанимация қызметін алуды, оларды медициналық жабдықпен, дәрі-дәрмекпен қамтамасыз етуді тапсырған болатын», – деді вице-министр.Айша ЕРСҰЛТАН