Алматыда 2015 жылы сал­танатты жағдайда ашылған Орта Азиядағы ең ірі Global Ecological Group Almaty (GEGA) логистикалық орта­лығы таяу арада бұзылмақ. Бұл кешен кедендік рәсімдеу, тауарды сақтау және аймақ­тарға жөнелту қызметтерін көрсетіп келген. Логис­тика­лық орталық құрылысы 2007 жылы басталып, 2010-2014 жылдарға арналған үдемелі индустриалды-инновация­лық дамудың мемлекеттік бағдарламасы аясында жүзе­ге асырылған.

«Қазақстанның 30 кор­поратив­­ті көшбасшылары» үкі­меттік бағдарламасының серпінді жобаларының тізіміне еніп, мега­полистің азық-түлік қауіпсіздігін қамтамасыз етудегі стратегиялық нысаны саналған. Аумағы 20 мың шаршы метрді алып жатқан ауқымды жоба құрылысына ке­зінде ел бюджетінен 4,5 миллиард теңге жұмсалған. Ең қын­жылар­лық жайт – бес-алты жылдан бері сол жерде жұмыс істеп, ел қатарлы нәпақасын тауып жүрген 1 200 адам жұмыссыз қалады. 50-ге жуық кәсіпорын қызметкері осы күнге дейін шетелден келетін түрлі тауарларды кедендік рәсімдеуден өткізіп, еліміздің барлық айма­ғына жөнелтіп отыр. Алайда 2020 жылдың 27 шілдесінде Алматы қа­ласының азаматтық істер жө­нін­дегі сот алқасы логистикалық кешенді үш айдың ішінде бұзу туралы шешім шығарған. Нысан орналасқан жердің қожайыны ретінде сотқа талап арызды Қор­ғаныс министрлігі берген. Жер дауына байланысты мәселе­мен көпшілік біраздан бері хабардар. Қорғаныс министрлігі логис­тика­лық орталықтың заңсыз салын­уына байланысты түсінік те берді. «Алматы қаласында Қорғаныс министрлігіне қарайтын 15 гектар жер телімі құқық белгілейтін құжат негізінде (1999 жылғы 29 қазандағы Алматы қаласы әкімінің №905/189 шешімі) 2005 жылы Әкімшілік логистика орталығын салу үшін Global Eсological Group Almaty ЖШС-ға заңсыз берілген болатын. Жерді берудегі заңсыз­дық 2009 жылдың 15 мамырында Ал­маты қаласы Маман­дан­дырыл­ған ауданаралық экономикалық сотының және 2020 жылдың 27 шілдесіндегі Алматы қаласы Аза­маттық істер жөніндегі соттың ап­пеляциялық сот алқасының ше­шімімен белгілі болды» делін­ген Қорғаныс министрлігі тарат­қан хабарламада. Байқап отырғандарыңыздай, құрылыс басталған кездің өзінде бұл жерде дау туған. 2009 жылдың 15 мамырында Алматы қаласы Мамандандырылған ауданаралық экономикалық сотының шешімі­мен жерді берудегі мәміле заңсыз деп танылған. Әйтсе де, Global Eсological Group Almaty ЖШС құрылысты одан әрі жалғастырып, тіпті 2015 жылы логистикалық орталықты салтанатты жағдайда ашты. Жылдар бойы жалғасып келе жатқан даулы мәселеге өткен жылы Алматының Азаматтық істер жөніндегі соттың ап­пеляция­лық сот алқасы шешім шығарды. Логистикалық орталықты бұзуға қаулы етіп, іс Қорғаныс министр­лігінің пайдасына шешілді. Былай алып қарағанда, Қор­ғаныс министрлігінің уәжі де орын­ды. Логистикалық орталық құрылыстары орналасқан жер учаскесі әскери әуеайлақтың ұшу-қону жолағына тым жақын орна­ласқан. Бұл әуе кемелері мен аза­мат­тық ғимараттарды пайдалануға қауіп төндіреді. Тап осындай жағдайдан сабақ алатындай болған жайымыз бар, 2019 жылдың со­ңында  Алматы әуежайы маңына салынған тұрғын үйді «сүзген» Bek Air әуе компаниясының ұшағын көпшілік әлі ұмыта қойған жоқ. Осы аумақта орналасқан әуе база­сы да Қазақстанның әскери қауіп­сіздігін қамтамасыз ету жүйесіне кіреді.

«Алматы қаласында Қорғаныс министрлігіне қарайтын 15 гектар жер телімі құқық белгілейтін құжат негізінде (1999 жылғы 29 қазандағы Алматы қаласы әкімінің №905/189 шешімі) 2005 жылы Әкімшілік логистика орталығын салу үшін Global Eсological Group Almaty ЖШС-ға заңсыз берілген болатын.

Сөз басында айтқанымыздай, ло­гис­тикалық орталықтың жұмы­сын одан әрі жалғастыруы осында жұмыс істейтін қызметкерлер үшін де аса маңызды. Қорғаныс ми­нистрлігі осы жағын ескере отырып, бірнеше рет өзара қолай­лы шешім іздеу бойынша келіс­сөздер жүргізу туралы бастама көтерген. Алайда логистикалық орталық басшылары қызығу­шылық танытпай, қорғаныс ведомствосының ұсыныстарын елеусіз қалдырады. «Біз апелляциялық шағым бер­дік. Бірақ сот ол бойынша арызды әлі қараған жоқ. Жағдай өзгерген жоқ десе де болады. Сот шешімі сол күйінде қалды. Алматы қалалық сотына қараша айында қайта шағым түсірген едік, іс қаралған жоқ. Логистикалық орталық бұрынғыдай жұмыс істеп тұр. Қазір мыңнан астам адам жұмыс орнында. Бірақ екіұдай жағдайда отырмыз. Жұмысшылар алаңдаулы. Жер ұзақ уақыт қарау­сыз жатты. «Ұшақтар ұшып- қо­нуға кедергі» дейді. Қорғаныс ми­нистрлігі сонда 2005 жылы құ­рылыс жүріп жатқанда неге дау­рықпады? Тіпті, 2015 жылы нысан құрылысы бітіп, жұмысын бас­тағанда неге келмеді? Бұған енді нақты біреулер көз тігіп отыр. Түр­ксіб ауданында жер учаскесі жетеді. Бес жылдан соң жұ­мысымыз­дың нәтижесін енді кө­реміз деп отырғанда, қиын жағ­дай­ға тап болдық», – деді логис­тика­лық орталықтағы басқарушы компания басшысы Қайролла Әлішев. Логистикалық орталық бұзыл­са азық-түлік, дәрі-дәрмек, тұр­мыстық техника – бәрі де қым­баттайды дейді мамандар. Қазір қоймада 46 мың куб тауар сақтаулы тұр. Мұндағы барлық жүкті алып кету үшін 1 200 жүк көлігі тәулік бойы үздіксіз жұмыс істегеннің өзінде 3 ай уақыт керек екен. Ең сорақысы – кәсіпкерлердің өз тауарын қоятын басқа жері жоқ.

Гүлнар ЖҰМАБАЙҚЫЗЫ