Алматы облысы Талғар қаласының ауруханасына пышақ жарақатымен түскен 40 жастағы келіншек қайтыс болды. Марқұмның өліміне басты күдікті күйеуі болып отыр. Бұл жайында Алматы облыстық полиция департаменті Instagram парақшасында хабарлады.
Полицияның мәліметінше, Өстемір ауылында тұратын келіншек ауруханаға пышақ жарақатымен түскен. Алайда дәрігерлер оны құтқарып қала алмаған. Әйелдің жарақатпен түскені туралы хабарлама алған полицейлер бірден оның тұрғылықты мекенжайына аттанған.
Тергеу деректеріне сүйенсек, марқұмды пышақтаған деп күйеуі күдікке алынды. Олар азаматтық некеде еді. Өзі – Өзбекстан азаматы, жасы – 35-те.
Күдіктінің сөзінше, олар ішімдік ішіп отырғанда сөзге келіп қалған. Сол кезде ер адам келіншектің ішіне ас үй пышағын сұғып алған. Күдікті бірден жедел жәрдем шақырмаған екен. Соның салдарынан әйелге дәрігерлер дер кезінде көмек көрсете алмады.
Қазір аталмыш факті бойынша «Абайсызда адам өліміне әкелген денсаулыққа қасақана зиян келтіру» бабы бойынша қылмыстық іс қозғалған. Шетел азаматы уақытша ұстау изоляторына қамалған.