Ел Үкіметі билік тармақтары арасында соңғысы болып, биылғы жылжабар отырысын өткізді. Жылда әзіл-қалжыңға құрылатын қорытынды жиын бұл жолы шат-шадыман көңіл күйден ада. Күні кешегі ұлттық «Аза тұту күні» Министрлер кабинеті үшін жыл «нүктесін» қойғандай.
Әйтсе де, жылдағы басқа бір дәстүр сақталды. Үкіметтің биылғы соңғы отырысында Премьер-Министр келесі жылға тапсырмалар берді. Үкімет заң жобалау жұмыстарының 2020 жылға арналған жоспарын бекітті.
Жыл өткен сайын қабылданатын жаңа заңдар саны да күрт азайды. Бірақ бұл «Қазақстанда қажетті заңдардың барлығы қабылданып болды» дегенді білдірмесе керек. Әйтпесе, қазіргі жоғары технология ғасырында, аумалы-төкпелі заманда өмір көз ілеспес жылдамдықпен өзгеруде, бар сала жаңғырып жатыр. Оның барлығы заңнамада әзірге толық көрініс тапқан жоқ. Сондықтан заңгерлер осы бағытта республикада жасампаздық күйзелісі барлығы туралы пікір білдіреді.
Мысалы, 2002 жылғы Үкіметтің заң жобалау жұмысы жоспарына 60 жаңа заң жобасы кірген болатын.
Осы салаға жауапты Әділет министрі Марат Бекетаевтың айтуынша, Парламентке 2019 жылы небәрі 32 заң жобасы енгізілген. Іліп аларына тоқталсақ, «Педагог мәртебесі туралы», «Халық денсаулығы және денсаулық сақтау жүйесі туралы» кодекс, Экологиялық кодекс және басқалары бар. Ал келесі жылы бұл көрсеткіш тағы да екі есе кемімек.
– 2020 жылғы жоспар жобасына өзекті және маңызды мәселелерді шешуге Елбасы Нұрсұлтан Назарбаев пен Мемлекет басшысы Қасым-Жомарт Тоқаевтың тапсырмаларын орындауға бағытталған 17 заң жобасы енгізілді, – деп растады Үкімет жетекшісі А.Мамин.
Оның ішінде Мемлекет басшысының сайлауалды бағдарламасын және Жолдауын іске асыруға арналған заң жобалары қарастырылған. Бұдан бөлек, жобасы қазірдің өзінде ардагерлер наразылығын туғызып отырған «Ардагерлер туралы», сондай-ақ «Өсімдіктер әлемі туралы» және қолданыстағы заңнамаға өзгерістер енгізуді көздейтін бірқатар заң жобалары бар.
Үкімет басшысы министрлерге өздеріндегі заң жобалау жұмысын жеке бақылауға алуды тапсырды және онсыз да аз жобаны уақытында дайын дамығандары жазаға тартылатынын нықтады.
– Жоспарлы заң жобаларын енгізу мерзімі бұзылған жағдайда мемлекеттік органның тікелей бірінші басшысының жауапкершілігі қаралатын болады! – деді Асқар Мамин.
Сонымен қатар Әділет министрлігіне жұмсақтық пен иліккіш қасиетін таныта бермей, Үкіметтің заң жобалау жұмыстарының жаңа жоспарын іске асыру кезінде бақылауды күшейтуді жүктеді.