Nur Otan партиясы үшін 2019 жыл жемісті әрі жеңісті болды. Партия өзінің 20 жылдық мерейтойын атап өтті, 2 съезд өткізді, Қасым-Жомарт Тоқаевтың президенттік сайлаудағы жеңісін атап өтті және жүйелі түрде партияны «қайта жаңғырту» процесін жандандырды.
Партия 20 жылдық мерейтойы қарсаңында бірқатар әлеуметтік маңызы бар бастамаларды жүзеге асырды. Бұл туралы 27 ақпанда Тұңғыш Президент – Елбасы, партия Төрағасы Нұрсұлтан Назарбаевтың басшылығымен өткен Nur Otan партиясының ХVІІІ съезінде айтылды. Өз кезегінде Нұрсұлтан Әбішұлы Қазақстанның соңғы 20 жылдағы жетістіктерін еске ала отырып, елімізде болып жатқан барлық оң өзгерістердегі партияның рөлін атап өтті.
– Біздің басымдық беріп отырған бағытымыз – азаматтардың лайықты өмір сапасын қамтамасыз ету және Қазақстанды әлеуметтік тұрғыда дамыған мемлекет ету. Тіпті қиын-қыстау уақытта да біз өзіміздің әлеуметтік міндеттерімізді орындадық. Елде әлеуметтік шығын деңгейі қашанда жоғары болды және алдағы уақытта ол сатылап өсе береді. Әртүрлі бағдарламалар, жобалар мен бастамалар аясында біздің тарапымыздан ауқымды әлеуметтік инвестициялар жүзеге асырылып келеді. Біз даму үшін шығынды азайтпауымыз керек және көмекке мұқтаждарға қолдау танытуымыз қажет. Биыл әлеуметтік салаға республикалық бюджет шығынының 45%-ы бағытталды, – деді Н.Назарбаев.
Елбасының XVIII съезде айтқан сөздерін қолдай отырып, халықтың әлеуметтік проблемаларын шешуге және әсіресе, ауылдық жерлерде инфрақұрылымды дамытуға бағытталған 4 жаңа партиялық жоба іске қосылды. Бұл «Бақытты отбасы», «Халыққа көмек», «Құтты мекен» және «Ауыл – ел бесігі» жобалары.
XVIII съезде, сондай-ақ мемлекеттік органдарға білім, денсаулық, инфрақұрылым, көлік, аймақтық саясат және Nur Otan партиясының 2030 жылға дейінгі «Бақуатты қоғам: онжылдықтың 10 мақсаты» бағдарламасын қабылдау жөнінде нақты тапсырмалар да жүктелді.
Сәуірдің 23-і күні Нұр-Сұлтан қаласында өткен Nur Otan партиясының ХІХ съезінде сөз сөйлеген Қазақстанның Тұңғыш Президенті Нұрсұлтан Назарбаев алдағы кезектен тыс президент сайлауына билік партиясынан кандидат ретінде ұзақ жылдан бергі серігі Қасым-Жомарт Тоқаевты ұсынды.
– Мен саналы түрде шешім қабылдадым. Ондай шешім бір күнде немесе бір айда қабылданбайды. Бұған бірнеше жыл бойы дайындалдым. Үш жылдан астам уақыт кетті. Жан-жақты зерделеп, келешекті бағамдап, өткенді сараладым. Осы уақытқа дейін тәрбиелеген және әрқайсысына сенім артқан кадрларды қарай келе осындай шешімге келдім, – деді Н.Назарбаев өзі жетекшілік еткен партия съезінде.
Елбасы елдегі жоғары лауазымға лайықты үміткер болған Қасым-Жомарт Тоқаев екенін, оның Отан алдындағы сіңірген еңбегі мен жетістіктерін де айтуды ұмытпады. Бұдан кейін съезде сөз алған жетекші партияның мүшелері Қасым-Жомарт Тоқаевтың кандидатурасын бірауыздан қолдап, президент сайлауына партия атынан түсетін үміткер ретінде бекітті.
Нұрсұлтан Назарбаев партия таңдаған саяси және экономикалық бағыттың сабақтастығын және алға қойылған барлық міндеттерді жүзеге асырудың кепілі болуы керек екендігіне баса назар аударды. Билік партиясынан кандидаттың сайлауалды науқанының аясында барлық аймақтық, аумақтық филиалдар мен бастауыш партия ұйымдары қатысқан кең ауқымды #BIRGE науқаны өткізілді. Республикалық және аймақтық деңгейде кандидаттың штаб-пәтері мен сенім білдірілген адамдары 113 мыңнан астам іс-шара өткізді. Нәтижесінде қазақстандық сайлаушылардың 70%-дан астамы Nur Otan партиясынан сайлауға түскен кандидатқа дауыс берді.
Сайлаудан соң 21 тамызда елордада Тұңғыш Президент – Елбасы Нұрсұлтан Назарбаевтың төрағалығымен
Nur Otan партиясы Саяси кеңесінің кеңейтілген отырысы өтті. Жиынға төрағалық еткен Нұрсұлтан Назарбаев еліміздегі жетекші партияның Тәуелсіздік жылдарында атқарған жұмыстарына оң баға беріп, оның барлығын халық көріп отырғанын айтты. Кеңесте күн тәртібіне сәйкес партия бағдарламаларының орындалу барысы, партия жұмысын жаңғырту мен алдағы кезеңге арналған жұмыстың басым бағыттары қаралып, Саяси кеңес бюросының құрамына өзгерістер енгізу мәселесі талқыланды. Отырыс барысында Елбасы барлық азаматты мемлекеттің өткір әлеуметтік-экономикалық проблемаларын шешу үшін партияға қосылуға шақырды. Сондай-ақ ел аймақтарындағы азаматтардың проблемаларын шешуде партияның жұмысын жандандыру қажет екенін айтты.
Бұл ретте партияны жүйелі түрде «қайта жаңғырту» процесі өте қызу жүретінін атап өткен жөн. Nur Otan кең ауқымды модернизация басталғаннан кейін, яғни 2 ай өткен соң, елдің барлық саяси бірлестіктерінің ішінде бірінші болып пилоттық режимде партияның кадрлық резервіне іріктеу өткізді. 14 қала мен ауданда партияға жаңа, белсенді мүшелер қабылданды және олар өз аймақтарының проблемалары мен ерекшеліктерімен жақсы таныс болды.
Партияның облыстық филиалдары төрағаларының бірінші орынбасарлары ауыстырылды, партиялық бақылау комитетінің және сыбайлас жемқорлыққа қарсы іс-қимыл жөніндегі республикалық қоғамдық кеңестің басшылығы жаңартылды. Алдымен мәслихаттардың депутаттық фракцияларының отырыстарында әкімдердің аумақтық даму бағдарламаларының орындалуы туралы есептері тыңдалды. Қоғамдық қабылдаулар жұмысын едәуір күшейтті. Мәселен, Республикалық Қоғамдық қабылдау бөлмесінде азаматтарды іс жүзінде күн сайын орталық атқарушы органдардың басшылары ғана емес, Парламент депутаттары да қабылдады.
2019 жылдың 25 қарашасында партияның соңғы үлкен отырысы – Елбасының Nur Otan партиясының облыстық филиалдарының өкілдерімен кездесуі өтті.
– Nur Otan біздің қоғамымыздың алуан түрлілігін көрсетеді. Біз – ел болашағына жауапты бүкіл Қазақстан халқының партиясымыз, нақты істер партиясымыз. Бізде Қазақстанның дамуына қатысты нақты ұстаным бар, тиісті стратегия мен жұмыс жоспарлары бекітілді, қажетті ресурстар қарастырылған, – деді Қазақстанның Тұңғыш Президенті.
Сонымен қатар Партия Төрағасы қоғамды Қазақстан Президенті Қасым-Жомарт Тоқаевтың төңірегінде топтастырудың және Мемлекет басшысы алға қойған міндеттерді жүзеге асыру үшін шаралар қабылдаудың маңызына тоқталды.
Сонымен бірге Нұрсұлтан Назарбаев Қазақстанның тәуелсіздік жылдарындағы табыстары туралы айтып, елдің барлық жетістіктері партиямен және партия мүшелерінің күнделікті жұмысымен тығыз байланысты екенін атап өтті.
– Соңғы жылдары Қазақстанның жалпы ішкі өнімі 11 млрд-тан 170,5 млрд долларға дейін өсті. 90-жылдардың басында халықтың үштен бірінен көбі кедейлік шегінде өмір сүретін. Бүгінде бұл көрсеткіш 4,6%-ға дейін төмендеді. Шағын және орта бизнестің ЖІӨ-дегі үлесі 27% құрайды. Біз 300 млрд доллардан астам тікелей шетелдік инвестиция тарттық. Осы жылдар ішінде Қазақстанның транзиттік әлеуетін едәуір нығайта алдық, – деді Елбасы.
Сондай-ақ Тұңғыш Президент Қазақстанның 2050 жылға дейінгі даму стратегиясының негізгі басымдықтарын алға жылжыту және түсіндіру бойынша жұмысты ұйымдастырудың маңызына назар аударды. «Біз нақты істің партиясымыз» деген Елбасы партия тарапынан нақты істі бастауға, оны аяғына дейін жеткізуге мүмкіндік мол екеніне ерекше сенім білдірді.