Бүгінде «Nur Otan» партиясының қоғамдық қабылдау бөлмелеріне тұрғындардан өтініш жиі түсіп жатыр. Осыған байланысты Түркістан облысында «Nur Otan» партиясы атынан сайланған депутаттар халықтың мұң-мұқтажын тыңдап, мәселелерін шешуге кірісіп кетті.
Солардың бірі – Түркістан облысы Созақ аудандық мәслихатының депутаты, жеке кәсіпкер Бағлан Сүгірбаев. Бірінші рет депутаттық мандатқа ие болған ол тұрғындардың өтінішіне сәйкес, Созақ ауданы Шолаққорған ауылының аз қамтылған, асыраушысы жоқ отбасыларына, мүмкіндігі шектеулі жандары бар отбасыларға көмек көрсетті. Халық қалаулысы 50 отбасына 1 тоннадан көмір түсіріп берді. Дәлірек айтқанда, 35 шаңыраққа көмір түсіріп берсе, 15 отбасының әрқайсысына көмір алатын қаражат ұсынды. Үйлерге көмірді үлестіріп, таратып беруге әдеттегідей Созақ аудандық Жастар ресурстық орталығының жанынан құрылған Value еріктілер ұйымы көмектесті. Тұрғындар депутат пен ерікті жастарға ризашылығын білдірді. Аталған кәсіпкер былтыр пандемия кезінде Созақ ауданындағы ондаған отбасына азық-түлік таратқан болатын. Сонымен бірге Төлеби ауданындағы су тасқыны кезінде төлебилік бірнеше отбасына көмек қолын соза білді. Түркістан облысы бойынша облыстық, аудандық және қалалық мәслихаттарға «Nur Otan» партиясы фракциясынан 263 депутат сайланды. Оның 37-сі – облыстық мәслихат депутаттары. Бұл азаматтар Түркістан облысының барлық аудан, қалаларында қоғамдық қабылдау өткізіп жатыр. Қаңтар айынан қазір дейін Түркістан облысында барлық деңгейдегі мәслихаттардың жаңа депутаттары 70 кездесу өткізіп, 214 тұрғынның өтініші мен талап-тілегін қабылдап үлгерді. Айта кетсек, 2020 жылы «Nur Otan» партиясының қоғамдық қабылдау бөлмесіне еліміз бойынша 393 мыңнан аса өтініш келіп түсті. Бұл 2019 жылмен салыстырғанда 2 есе көп. Соңғы 5 жылда партияға 1,2 млн адам жүгінді, оның ішінде 423 мыңнан астамы – онлайн форматта. Олардың 92 пайызы шешімін тапты, тегін консультативтік, құқықтық және өзге де көмек көрсетілді. Талдау көрсеткендей, халықты негізінен әлеуметтік қамсыздандыру мәселесі – 30%-ға, тұрғын үй-коммуналдық шаруашылық – 16%, тұрғын үймен қамтамасыз ету – 15%, еңбек даулары – 14%, құрылыс – 9%, білім беру – 9%, медициналық қызмет көрсету 7%-ға алаңдататыны белгілі болды.Әбілмансұр ЖАСАН