«Nur Otan» партиясы Жамбыл облыстық филиалы Партиялық бақылау комиссиясы «Кедергісіз келешек» партиялық жобасының жүзеге асырылуы аясында қоғамдық көліктер мен аялдамалардың мүмкіндігі шектеулі жандарға қолжетімділігін анықтау үшін партиялық рейд жүргізді.
Комиссия мүшелері былтыр Тараз қаласы аумағында орнатылған жаңа үлгідегі 25 аялдаманың бірқатарын аралап көрді. Тараз қаласы әкімдігінің тұрғын үй-коммуналдық шаруашылық, жолаушылар көлігі және автомобиль жолдары бөлімінің сектор меңгерушісі Мұрат Кәрібаев жаңа үлгідегі аялдамаларда биыл пандустар орнатылып, жарықтандыру жүргізілетінін жеткізді. Комиссия мүшелері бұған дейін де мүмкіндігі шектеулі жандарға қажетті пандустар орнатылған аялдамалардың жағдайымен танысып, оларға қатысты сын-ескертпелер айтты. Мұнан бөлек, қоғамдық көліктердің ерекше қажеттілігі бар азаматтардың мініп-түсуіне, еркін қозғалуына ыңғайлылығы тексерілді. Сонымен қатар жұмысшы топ Тараз қаласындағы теміржол бекетінде болып, нысанның мүмкіндігі шектеулі жолаушыларға қызмет көрсетудегі мүмкіндігін зерделеді. Келер аптада партиялық рейдтің қорытындысы бойынша Партиялық бақылау комиссиясының отырысы өтеді. Тараз қаласы әкімдігінің салалық бөлімдерінің басшылары мен аялдамаларды орнатуға жауапты мердігерлер қатысатын жиында қоғамдық көліктер мен аялдамалардың мүмкіндігі шектеулі жандарға қолжетімділігі кеңінен талқыланбақ.Әбілмансұр ЖАСАН