Биыл 600 мыңға жуық адам тұратын 905 ауыл мен қала су астында қалуы мүмкін. Бұл туралы Төтенше жағдайлар бірінші вице-министрі Ибрагим Күлшімбаев хабарлады. Сонымен бірге Ақмола, Ақтөбе, Батыс Қазақстан, Қарағанды, Қостанай және Солтүстік Қазақстан облыстарында тоңның былтырғыдан тереңірек қатқаны анықталып отыр.
Жалпы алғанда, биыл елімізде қар аз түскен. «Қазгидрометтің» алдын ала болжамынша, Ақмола, Ақтөбе, Атырау, Батыс Қазақстан, Қарағанды және Солтүстік Қазақстан облыстарының өзен бассейндеріндегі ылғал мен еліміздегі жалпы қар қоры орташа көпжылдық деңгейден төмен. Алайда бәрібір су басу қаупі сақталуда. Жалпы, елімізде «Су тасқыны қаупінің алдын алу және оларды жою жөніндегі шаралар кешені» аталатын жол картасы аясында 4 жыл ішінде қорғаныс бөгеттерін салу, қорғаныс құрылыстарын жөндеу, жағалауды бекіту, су тасқыны қаупі бар өзендердің арналарын тереңдету және түзету бағытында 402 іс-шара орындалған. Жол картасындағы іс-шаралар 315 елді мекенде су басу қаупін толығымен жоюға және 314 елді мекенде азайтуға мүмкіндік берді. Қалың тоң кешірек ериді. Әзірге еріген қарға байланысты 276 елді мекенге тасқын қаупі төніп тұр. Биыл еліміз бойынша әкімдіктер төтенше резервтер мен шұғыл шығындарға арналған резервтерге 36,6 миллиард теңге бөлді. 180 мың тонна жанар-жағармай, 142 мың тонна инертті материал, 700 мың қап және жарылғыш зат дайындалыпты. Қажет болған жағдайда зардап шеккен адамдарды уақытша орналастыру үшін 3 мыңнан астам пункт ашылады. Оған 1 миллион адамды орналастыруға мүмкіндік бар. 10 өңірде – Ақмола, Ақтөбе, Жамбыл, Алматы, Қарағанды, Қостанай, БҚО, СҚО, ШҚО және Түркістан облыстарында 60 аса ірі су қоймасына апта сайын мониторинг жүргізілуде. Ал наурызда «Көктем-2021» республикалық оқу-жаттығуы өткізіледі. Оның басқару штабы Павлодар қаласында орналаспақ. Елді мекендерден қар шығаруға, гидротехникалық құрылыстардың суды қабылдауға және апатсыз өткізуге дайындығына қатысты бірқатар мәселе бар. Сондай-ақ 344 ғимарат жөндеуді қажет етеді. ТЖМ күштері мен құралдары көктем мезгіліндегі төтенше жағдайларға дайын екені мәлім етілді. 10 мыңнан астам қызметкер және 1 800 бірлік техника жұмыла кетуге әзір.Е.СЕНБАЙ