Оралда тоғыз қабатты жатақханада өрт шығып, 73 адам эвакуацияланды, деп хабарлайды ҚазАқпарат. БҚО ТЖ департаментінің баспасөз қызметінен түскен мәліметке қарағанда, оқиға бүгін Исатай-Махамбет көшесі 82/1-мекенжайында болды. Сағат 03.27-де өрт шыққаны жөнінде хабар түскен. Барлау барысында бірінші қабаттағы қосалқы үй-жайда жеке заттардың жанып жатқаны анықталды. Жатақханадан 73 адам, соның ішінде 17 бала қауіпсіз жерге шығарылды. Тілсіз жауды ауыздықтауға 17 адам 6 техникамен қатысты. Өрт сағат 04.09-да сөндірілді. Қазіргі кезде өрттің шығу себебі мен келтірілген шығын анықталу үстінде.