Жайық өзеніне сырғанамақ болып кеткен жасөспірімнің бірі тілсіз жаудың құрығынан босай алмады. Учаскелік полицейлер өр өзеннің суық құшағынан екі жасөспірімді жанталаса құтқарып алды. Біреуі өзен тереңіне қарай ағып, келесі күні мүрдесін құтқарушылар тапты.
Оқиға қаңтардың 4 күні кешке болған. 11-15 жас аралығындағы төрт жасөспірім Атырау қаласының шетінде орналасқан Томарлы-2 ауылы тұсындағы Жайық өзенінде мұз үстінде ойын қызығымен жүргенде мұз ойылып кеткен. Батып бара жатқан жерлерінен бір жасөспірім өзі шығып үлгеріп, ұялы телефонымен 19 сағат 40 минут шамасында «102 операторына» хабарласады. Атырау облыстық полиция департаментінің баспасөз қызметінің мәліметіне сүйенсек, хабарлама түскен бойда сол маңайдағы барлық патрульдерге хабар жеткізген. Аумақта қызмет атқарып жүрген Атырау қалалық №2 полиция бөлімінің учаскелік полиция инспекторлары полиция капитаны Қуандық Сүйіндіков пен полиция аға лейтенанты Тимур Балмағанбетовтер жағалауға жетеді. Қараңғылық пен қалың тұманнан айналаны көру қиындығын ескерген полиция қызметкерлері қызметтік көліктің жарығын жағып, жағалауда қалдырады. Күн жылылығынан жұқалай ғана қатқан өзен бетімен жүріп, дыбыс тыңдап, ойылып кеткен мұздан тек бастары ғана шығып тұрған екі жасөспірімді судан шығарып алады. Аяқ-қолдары құрысып, қалшылдап тоңып, сөйлесуге жағдайлары жоқ балалардың үстеріндегі мұз қатқан киімдерін шешіп, инспекторлар өздерінің киімдерімен орап, жағалауға жеткізіп, жедел жәрдем қызметкерлеріне тапсырады.
Ал суға батқан 2004 жылғы жасөспірімнің денесін құтқарушылар 5 қаңтар күні кешке тапқан.
«Естігенде есіміз шықты, балаларымызды судан шығарып құтқарып алған полиция қызметкерлеріне айтар алғысымыз шексіз...», – дейді 11 жастағы жасөспірімнің анасы Құралай Мусина.
Оқиға болған күннің ертеңіне полиция департаменті балаларды құтқарған полицейлердің бейне тіркегіш жетонына жазылған бейнекөріністі жұртшылық назарына ұсынды. Ол бейнедеректе судан басы ғана шығып, құтқарыларына үміті қалмаған жасөспірімнің бірінің «Мама, мен сені жақсы көремін. Аға, мен сені жақсы көремін...» деген әлсіз естілген сөздері жазылып қалған. Бұл бейнедеректі көрген жұртшылық осы сөздерді айтқан баланың отбасында адамгершілік қасиеттерді бойына сіңіргеніне ризашылық білдіріп, судан құтқарылмай қалған жасөспірімнің өліміне қайғыра көңіл айтты. Өзен суының ауа райының жылылығынан әлі де қатпағанын ескертіп, қайғының алдын алуға кеңес берді.
Атырау облысы Төтенше жағдайлар департаменті 2019 жылы Жайық өзенінде суға батқандардың жалпы саны – 12 және 4 адам судан құтқарылған деген дерекпен бөлісті. Сайып келгенде тілсіз жаумен арпалыста аман қалу көп жағдайда мүмкін емесін ойын баласы тұрмақ, ересектер есте сақтай бермейтіні қайғылы жағдайға әкеледі.
Атырау облысы