Еуразиялық одақ құрылымдарында Қазақстанның өкілдері тең дәрежеде ұсынылуы керек. Әзірге оларда Ресей өкілдерінің саны басым. Осы мәселені Мәжіліс Спикері Нұрлан Нығматулин палатаның жалпы отырысында көтерді. Ол интеграциялық бірлестіктердің жұмыс органдарында Қазақстанның тең шамада ұсынылу принципі сақталуға тиіс екенін атап өтті.
Жиында Мәжіліс депутаттары «2011 жылғы 22 маусымдағы Кеден одағына мүше мемлекеттердің кеден қызметтерінің біріккен алқасы туралы шартқа өзгерістер енгізу туралы хаттаманы ратификациялау туралы» заң жобасын талқылады. Соның барысында олар біріккен алқаның әртүрлі бағыт бойынша 10 жұмыс тобының біреуіне ғана қазақстандық тараптың өкілі, ал қалған 9-ына Ресей өкілдері басшылық ететініне назар аудартты. Бұл мәселе Қазақстан мүддесін қорғау үшін аса маңызды екеніне екпін түсірген Нұрлан Зайроллаұлы өз саласын үлгі етті: қазақстандық депутаттар барлық парламенттік интеграциялық бірлестіктегі тәсіл-көзқарастарды өзгерту бағытында үлкен жұмыс жүргізіп жатқан көрінеді. – Нәтижесінде, қазір оларда толық дерлік ротация жүргізіліп тұрады. Дәл осыған жұмыс органдарында да қол жеткізуіміз керек. Бұл – келісу процесінің жемісі. Яғни, о баста келіссөздер жүргізіліп, құжаттар әзірленгенде біздің «азусыз» келіссөзшілеріміз бәріне бас шұлғып, табандамайды. Мұны түзететін кез жетті! – деді Н.Нығматулин. Құпталған бұл хаттама одақтас бес мемлекеттің кеден қызметтерінің біріккен алқасы туралы шарттың терминологиясын ЕАЭО туралы шарттың және ЕАЭО-ның Кеден кодексі туралы шарттың ережелеріне сәйкес келтіруге мүмкіндік береді. Себебі Кеден одағы Еуразиялық одаққа дейін құрылғаны мәлім. Осы жиында палата өзге де ратификациялық заң жобаларын мақұлдап, Сенатқа жолдады. Олардың қатарында «ТМД-ға қатысушы мемлекеттердің бас бостандығынан айырумен байланысты емес жазаларды орындауды беру туралы конвенцияны» ратификациялайтын, «Мемлекетаралық стандарттау жөніндегі құжаттарды тарату туралы келісімді ратификациялау туралы» заң жобалары бар. Жалпы отырыста Мәжіліс комитеттері бірқатар жаңа заң жобасын қолға алды. Оның арасында сот жүйесі мен судьяларының мәртебесі, Әкімшілік құқықбұзушылық туралы кодекске өзгерістер енгізу және сот жүйесін жаңғырту мәселелері бойынша заң жобалары бар. Сондай-ақ қашықтан жұмыс істеуді құқықтық реттеу үшін Еңбек кодексін жетілдіретін заң жобасы да Мәжілісте қаралды.Айхан ШӘРІП