Көкшетауда жеті күннен бері біраз халық мүлдем газсыз отыр. Оған дейін де аптаның екі-үш күнінде тұрақты түрде көгілдір отын өшіп, жұрт әбден қиналған. Жылдар бойы күнара өшіп қалатын газдың зардабын тартқан халықтың шағымданбаған жері қалмады. Бірақ көгілдір отынды тарататын «Газ Қызмет» айылын жимапты.
Биыл қыста, тіпті апталап газсыз отырған кездер аз болмаған. Тұрғындар газ сұрап хабарласса, дөрекі жауап беріп, тіпті анайы сөздердің де айтылып жататынын азаматтар жасырмады. Қыстың қытымыр аязында көгілдір отынсыз қалған көкшетаулықтар ащы жанайқайын бізге жеткізді. Мәселенің анық-қанығын білмек болып, зерттеп көрдік. Көкшетау қаласындағы Сәтбаев көшесі 16-үйдің тұрғындары газдың осыдан жеті жыл бұрын қосылғанын, «Газ Қызметке» тұрғындарды қосу мәжбүрлі түрде жүргізілгенін айтады. Олардың айтуынша, газға қосылу үшін әр пәтер 17 мың теңгеден төлеген. Алайда көгілдір отын тек алғашқы жылы ғана дұрыс берілген. Кейіннен аптаның екі-үш күнінде газсыз отыру қалыпты жағдайға айналған. «Міне, бес күннен бері газсыз отырмыз. Газға уақытында төлем жасасақ та, әр аптаның кемінде екі күнінде газ болмайды. Күнара болмағандықтан, ақысы да аз келеді. Есесіне, электр энергиясы үшін ай сайын 7-8 мың теңгеден төлеп келеміз. Ал бұл үй кезінде экологтерге берілген. Тұрғындардың көпшілігі зейнет жасындағы адамдар. Олар коммуналдық төлемдерді уақытында төлейді. Газгольдерге құйған газ тез таусылып қалады. Оларға хабарлассақ, телефондарын көтермейді, алса, жөндеп жауап бермейді. Көбіне дөрекі сөйлеп, телефон тұтқасын қоя салады. Олардың газ үшін төлейтін есепшоты да жоқ. Айдың 15-і күні газдың төлемін алуға бақылаушы келгенде үйде адам болмаса, бірден өсімақы есептейді. Ал өсімақы төлемнің 10 пайызымен есептеледі. Бұл заңға сәйкес келмейді. Сұрастырсақ, көрші орналасқан Ақан сері көшесіндегі 91-үйдің тұрғындарының қарызы көп. Ал екі үйге газгольдер ортақ екен. Бізге көрші үйдің тұрғындары қарызын төлетсе ғана газ қосылатынын айтты. Оның ақысы төленбей газ берілмейді. Ал төлемеген адамдар үшін біздің қандай кінәміз бар? Соны түсіне алмадық»,– дейді Көкшетау қаласының тұрғыны Ольга Боргер. Ольганың айтуынша, екі жыл бұрын үйдің бірінші қабатында газдың иісі мүңкіп тұрған. Тіпті, үйден өрт шығып кетпес үшін подъездер мен пәтерлердің терезесін үнемі ашып отыруға мәжбүр болыпты. Бірақ тұрғындар газ таратушы ұйымға қанша хабарласса да, мәселе шешілмеген. Мәселе екі жылдан соң шешілген. Ақан сері көшесі 91-үйдің тұрғындары да мәселенің шектен шыққанын жеткізді. Тұрғындар аталған жағдайды әлеуметтік желіде де жиі жазады. «Газ үнемі жоқ. Менің парақшамда 17 мыңнан астам тұрақты жазылушым бар. Ондағы пікірлерге қарасам, қаланың жартысына жуығы газ проблемасынан зардап шегіп келеді. Өткен жылдары шамамен он шақты рет газ болмай қалды. Ал биыл апталап газсыз отырмыз. Бірнеше рет «Газ Қызметтің» кеңсесіне де бардым. Олардың айтатын сылтауы көп. Борышкердің көп екенін, кейде көліктердің газгольдерді жауып тастайтынын, яғни қардан өте алмайтынын айтады. Шынымды айтсам, қазір тамақ істеп ішуіміздің өзі мұңға айналды. Қала әкімдігіне хабарласып, мәселеге араласуын сұрадық. «Олар бізге де сіздерге айтқандай жауап береді. Біз оларға ештеңе істей алмаймыз» деп жауап берді. Сонда біз не істеуіміз керек?» – дейді Даша Наурызбаева есімді Көкшетау қаласының тұрғыны. Газдың зардабын тартқан халықтың ащы зары жайлы Көкшетау қаласы әкімдігінен мән-жайды анықтамақ болдық. Әкімдік компанияға шаң жуытпады. Олардың айтуынша, қала халқының көгілдір отынға қарызы көп екен. Қала әкімдігінің мәліметінше, «Газ Қызмет» ЖШС-да 28 газ тарату қондырғысы бар. Көгілдір отын тартылған 80 көпқабатты үйде 5 257 адам тұрады. Олардың 2 909-ының үйінде газ бар. «Қала халқының көгілдір отынға қарызы көбейген. «Газ Қызмет» компаниясының мәліметінше, 1 ақпандағы жағдай бойынша 650 пәтердің жалпы қарызы 2,5 миллион теңгеден асады. Дегенмен тұтынушылардың қордаланған қарызына қарамастан компания газгольдерді толтыру үшін барлық шараны қабылдап келеді»,– деді Көкшетау қаласы әкімдігінің баспасөз қызметі. https://youtu.be/Ipx75aTVqQs Қалада орталықтандырылған газдың не себепті жиі болмайтынын «Газ Қызмет» компаниясының басшысынан білмек болдық. Бірақ әкімдік берген мәлімет пен газ таратушы компанияның берген дерегін салыстырсақ, абоненттер санындағы айырмашылық жер мен көктей. Алғашқыда компания басшысы бізбен тілдесуден мүлде бас тартып, тіпті кабинетінен итеріп шығармақ болды. «Ешқандай сұхбат бермеймін, тиісті басқарма мен қалалық әкімдікке барлық мәліметті бердім» деген «Газ Қызмет» ЖШС басшысынан аз мәліметті суыртпақтап әрең алдық. Компания басшысы газдың абоненттерден ағытылу себебін тұтынушылардың қарызының шамадан тыс көптігімен түсіндірді. «Қазір біз 49 көпқабатты үйге қызмет көрсетеміз. Жұрт тұтынған газы үшін ақы төлейді. Алдын ала төлем алмаймыз. Дегенмен жұрттың қарызы көп. Айлап-жылдап төлемейді. Бүгінде 2 миллион теңге нақты қарыз бар. Учаскелік инспекторлармен де, сот орындаушыларымен де бірге бардық. Бірақ ештеңе өзгерген жоқ. Бақылаушылар келіп есебін тапсырып жатыр. Ал абоненттердің жартысынан астамы үйлерінде жоқ немесе төлемейді. Біз не істеуіміз керек? Басқа амал қалмады. Газ тек басым бөлігі төленген газгольдерлерге ғана беріледі», – дейді «Газ Қызмет» ЖШС-нің басшысы Марал Каркенова. Сонымен, шаһар басшылығы мен газ таратушы компания тұтынушылардың көпшілігінің көгілдір отынға қарыз болғандықтан газдың берілмегенін түсіндірді. Қарыз төленбей, газгольдер іске қосылмайды. Дегенмен уақытында төлем жасап, қарызын өтегендердің борышкерлердің кесірінен зардап шеккені түсініксіз. Мәселе қалай шешіледі? Мұны біз алдағы уақытта да назарда ұстаймыз.Абзал АЛПЫСБАЙҰЛЫ, Ақмола облысы