Браконьерлердің тек ақбөкен аулауынан мемлекетке 2,4 миллиард теңге шығын келген. Бұл туралы Экология, геология және табиғи ресурстар вице-министрі Ерлан Нысанбаев хабарлады. Ведомствоның кеңейтілген алқа отырысында 2020 жылғы жұмыс қорытындысы шығарылды.
Министр орынбасарының айтуынша, Орман шаруашылығы және жануарлар дүниесі комитетінің инспекторлары өткен жылы киіктерге қатысты браконьерліктің 85 фактісін тіркеді. Бұл – анықталғаны ғана. Соның өзінде 727 киік ұшасы мен 9 743 мүйізі тәркіленді. 71 браконьер ұсталып, қылмыстық жауапкершілікке тартылды. Жалпы шығын – 2,4 млрд теңге. «Сондай-ақ 2020 жылы ІІМ және ҰҚК бірлесіп «Киік» табиғатты қорғау акциясын іске қосты. Оның аясында алдын алу іс-шаралары жандандырылды. Киіктер мен басқа да жабайы жануарлардың браконьерлігіне мамандандырылған бірқатар қылмыстық топтың жолы кесілді. Бұдан басқа, Қазақстанның барлық аумағында киіктерді, олардың бөліктері мен дериваттарын пайдалануға тыйым мерзімі 2023 жылға дейін ұзартылды. Беспилотниктерді, бейнетіркегіштерді, бейнежетондарды қолдануға негізделген «Smart патрульдеу» пилоттық жобасы іске қосылды. Инспекторлық құрам ІІМ оқу орталықтары базасында біліктілікті арттырудан өтті», – деді вице-министр. Е.Нысанбаев 2021 жылы елімізде «Жануарларға жауапкершілікпен қарау туралы» заң жобасы қабылданатынын жеткізді. Сондай-ақ 2030 жылға дейінгі Жануарлар дүниесін сақтау және аңшылық шаруашылықтарын дамыту мастер-жоспары бекітілмек.Айхан ШӘРІП