Экология, геология және табиғи ресурстар министрлігінің вице-министрі Ахметжан Пірімқұловтың айтуынша, қалалар мен ірі аудандарда қалдық жинайтын 84 полигон салу керек. Ол бұл жайында министрліктің кеңейтілген алқа мәжілісінде баяндап берді.
Оның айтуынша, қазір басты мәселе – экологиялық және санитарлық талаптарға сәйкес келмейтін полигондардың жағдайы. Ал министрлік елдегі аудандық және облыс орталықтарына қажет полигондар санына талдау жасаған. Есепке сәйкес, түрлі орталықта 110 полигон бар. Бұл көрсеткіш алдағы үш жылда бірінші кезеңде қалалар мен ірі аудандарға кемінде 84 полигон салу қажетін айқында-ған. Оған қоса, вице-министр 6 қалада қоқыс жағатын зауыт салу жоспарда барын айтты. Алда Нұр-Сұлтан, Алматы, Шымкент, Атырау, Тараз бен Ақтөбеде қоқыс жағатын зауыт салынады. Мұндай бастамаға басқа қалалар да қызығушылық танытқан сыңайлы. Сонымен, министрлік биыл бірінші жартыжылдықта аукцион өткізіп, энергия өндіруші ұйымдардың тізбесін жасайды. Екінші жартыжылдықта қорытынды шығару жоспарланған. Жалпы, елімізде қалдықтың жиналуын азайту үшін энергетикалық кәдеге жарату жолға қойылған. Яғни, қоқыс өртеліп, одан электр қуаты өндіріледі де, бұл жалпы электр желісіне сатылады. Мұндай технологияны Waste to energy деп атайды.А.ЖОЛДАС