Мәжіліс депутаты Омархан Өксікбаев өңірлерге жұмыс сапары аясында Алматы облысының Іле ауданына арнайы ат басын бұрып, Nur Otan партиясының қоғамдық қабылдауында жергілікті тұрғындармен кездесті. Мәжіліс депутаты қабылдауына келген алты тұрғынның өтініштері мен талап-тілектерін мұқият тыңдады. Қабылдау бөлмесінде тұрғындарды толғандырған әлеуметтік мәселелер талқыланып, оларды заң ауқымында шешу жөнінде жауапты орындарға тапсырма берілді.
Жергілікті тұрғындарды негізінен жол, көшені жарықтандыру, құрылысқа қатысты мәселе толғандыратыны белгілі болды. Омархан Нұртайұлы қабылдауға келген азаматтардың мәселелерін толық тыңдап, арыз-шағымды жазбаша қабылдап алды. Алдағы уақытта мәселелерді шешу заң аясында назарға алынады.
Осы күні Мәжіліс депутаттары Амангелді Дәуренбаев және Әбдіманап Бектұрғанов Іле ауданындағы «Лукойл Лубрикантс» ЖШС жұмысшыларымен жүздесіп, жұмыс барысымен танысты. «Лукойл Лубрикантс» ЖШС салалық ғылым мен майлар, қоспалар өндірісінің озық технологияларын дамытуда. Қазіргі кезде мекемеде 120 адам жұмыс істейді. Мақсатты көрсеткіші – жылына 100 мың тонна, одан ары 130 мың тоннаға дейін майлау материалын өндіру.
Ал Мәжіліс депутаты Зағипа Балиева Қарасай ауданындағы су тазалау стансасына барып, қызметкерлерге Мемлекет басшысының Жолдауын насихаттап, оның жүзеге асырылу барысын түсіндірді. Халық қалаулысы сондай-ақ нысандағы құрылыс жұмыстарын аралап, халықты сапалы ауызсумен және ағынды сулармен қамтамасыз етудің маңызы туралы айтты.
Жергілікті биліктің айтуынша, 2019 жылдың 29 қарашасында қолданыстағы Қаскелең су қоймасына ауыз су жеткізілген. Депутатпен кездесуден кейін халықты сапалы ауызсумен қамтамасыз ету шараларын одан ары жетілдіру мәселесі бақылауға алынды.
Әбілмансұр ЖАСАН