Алматыда Мәжіліс депутаттары бірқатар кездесулер өткізді. Тұрғындар кездесулерде барынша белсенділік танытып, өтініш-тілектерін білдірді.
Nur Otan партиясы Алатау аудандық филиалында Мәжіліс төрағасының орынбасары Гүлмира Исимбаева мен Мәжіліс депутаты, Nur Otan партиясы фракциясының мүшесі Серік Құсайыновтың азаматтарды қабылдауы өтті. Шараға Nur Otan партиясы Алматы қалалық филиалы төрағасының бірінші орынбасары Станислав Канкуров, Nur Otan партиясы Алатау аудандық филиалының төрағасы, аудан әкімі Шахмерден Рыспаев, Алматы қаласы басқармалары мен департаменттерінің өкілдері қатысты.
Депутаттар бұл күні 20-ға жуық азаматты қабылдады. Онда негізінен жер учаскесі мен тұрғын үй алу, АӘК-ті ресімдеу, медициналық сақтандыру сияқты мәселелер көтерілді.
– Біз бүгін Алатау ауданы азаматтарын қабылдадық. Аудан – қалың елді мекен. Мұнда жұмысшы мен өзін-өзі жұмыспен қамтыған халықтың көп бөлігі тұрады. Аудан 10 жыл бұрын ашылып, осы жылдар ішінде көптеген жұмыстар атқарылды. Жол, кәріз және жарықтандыру жұмыстары жүргізілді. Ауданда инфрақұрылым мәселесі шешіліп жатыр. Сонымен қатар азаматтардың тұрғын үй, газбен жабдықтау, көшені жарықтандыру сияқты жекелеген мәселелері бар. Мемлекеттік органдар оларды шешудің жолдарын қарастырады, жұмыс барысы біздің бақылауымызға алынады, – деді Гүлмира Исимбаева.
«Құтты мекен» партиялық жобасы аясында №147 балабақшада Мәжіліс депутаты, Nur Otan партиясы фракциясының мүшесі Зағипа Балиевамен кездесу өтті. Іс-шара кезінде З.Балиева балабақша қызметкерлеріне заңдарға енгізілген толықтырулар мен өзгертулер туралы айта келе, мемлекеттік бағдарламалардың маңызын түсіндірді.
– Қазір барлық облыстарда, өңірлерде сайлаушылармен кездесу өтіп жатыр. Біз еліміздегі аудандар мен ауылдарды аралаудамыз. Іссапар кезінде мемлекеттік бағдарламалар туралы айтамыз. Мысалы, Түрксіб ауданындағы біз барған балабақшада балаларға тамаша жағдай жасалған, – деді З.Балиева.
Jas Otan коуоркинг орталығында Мәжіліс депутаттары Жұлдыз Омарбекова мен Артур Платонов Алматы қаласының жастарымен кездесті. Шарада депутаттарға Нұргүл Асанованың Júrek store қайырымдылық жобасы таныстырылды. Сонымен қатар депутаттар Almaty Volunteers еріктілер жобасымен және «Қамқоршы» әлеуметтік жобасымен танысты.
Депутаттар 2019 жылдың жалғасы ретінде, 2020 жылды еріктілер жылының басталуын және жастар жылының қорытындысын талқылады. Бұдан басқа қатысушыларға Парламент Мәжілісінің және депутаттардың қызметі туралы айтылды.
– Қазіргі жастар өз ұстанымын қорғай алады. Олар елімізде болып жатқан жағдайға немқұрайды қарамайды. Өскелең ұрпақты тәрбиелеуде белсенді өмірлік ұстанымды қалыптастыруға аса назар аударылу қажет. Мұндай кездесулер жастар үшін де, біз үшін де өте өзекті, – деді Артур Платонов.
Тұрмыстық зорлық-зомбылық құрбандарына арналған дағдарыс орталығында Мәжіліс депутаттары, Nur Otan партиясы фракциясының мүшелері Серік Сейдуманов пен Ольга Шишигина кездесу өткізді. Іс-шараға Түрксіб ауданы әкімінің орынбасары Ермек Бейсеуов және Алматы қаласы әлеуметтік әл-ауқат басқармасының басшысы Рахат Шимашева қатысты.
– Дағдарыс орталықтары еліміздің көптеген аймағында жұмыс істейді. Олар қиын жағдайға тап болған отбасыларға көмектеседі. Бұл – азаматтарды әлеуметтік қамтамасыз ету және қорғауға бағытталған орын. Әйел адамдарға және олардың балаларына көмек қажет болғанда орталық тарапынан көптеген қолдау көрсетіліп тұрады. Мысалы, құжаттарды реттеу, медициналық көмек, азық-түлікпен қамтамасыз ету, білім алу және тағы басқа. Мұнда азаматтардың қауіпсіздігіне аса көңіл аударылады, – деді С.Сейдуманов.
Кездесу соңында Мәжіліс депутаттары орталықтың қызметіне оң баға берді. Өз тарапынан орталық қызметкерлері депутаттарға кездесу үшін алғыс білдірді.
Алматы қаласындағы «Құлагер» алғашқы медициналық-санитарлық көмек орталығына барған Мәжіліс депутаты, Nur Otan партиясы фракциясының мүшесі Зәуреш Аманжолова орталықтағы еңбек ұжымымен кездесті. Кездесу барысында мекеме басшысы Ұлмекен Смаилова мұндағы жұмыс жүйесі туралы айтып, алдағы жұмыс жоспарымен таныстырды.
Орталық 2008 жылы пайдалануға берілген. Қазіргі таңда мұнда 120-ға жуық жұмыс орны бар. Депутат орталық қызметін қадағалап, емделушілермен медициналық көмек көрсетудің сапасы, қолжетімділігі туралы әңгімелесті. Сонымен қатар іс-шараға қатысушыларға Президент Қасым-Жомарт Тоқаевтың Қазақстан халқына Жолдауының негізгі аспектілерін және міндетті медициналық сақтандыру жайлы айтып берді.
Гүлнар ТӘЖИЕВА