Биылғы 30 наурызда елдегі біраз жол ақылы болады, онда көліктердің тегін жүруіне тыйым салынады. Осы жолдардың кіреберісі мен шығаберісінде төлем жинау құрылғылары орнатылып жатыр. Бұлардан бюджеттің қанша пайда табатыны белгісіз. Тек қолданыстағы 4 ақылы автожолдан 2021 жылы бюджетке 5,7 миллиард теңге түсім түседі деп жоспарланып отыр.
Индустрия және инфрақұрылымдық даму министрлігінің мәліметінше, бүгінде елімізде келесідей ақылы күре жолдар жұмыс істеп жатыр: «Нұр-Сұлтан – Щучинск» (ұзындығы 211 шақырым), онда 1,67 млрд теңге жиналған. «Нұр-Сұлтан – Теміртау» (134 км): 1,91 млрд теңге түскен. «Алматы – Қорғас» (295 км): 1,03 млрд теңге әкелген. «Алматы – Қапшағай» (42 км): 1,12 млрд теңге кіріске кенелтіпті. «Бұдан бөлек, биыл бірінші тоқсанның соңына дейін төлем өндіру жүйесі республикалық маңызы бар жолдардың 5,8 мың шақырымына енгізіледі. 2025 жылға қарай ақылы жолдардың қатарына тағы 5,2 мың шақырым жол қосылады. Осылайша, Қазақстандағы ақылы жолдардың ұзындығы 11,7 мың шақырым болады», – деді министрлік. Осы арқылы мемлекет жолдарды өзін-өзі ақтайтын, өз шығынын өзі өтейтін дәрежеге жеткізбек. «Демек, бұл автомобиль жолдарын күтіп-ұстау үшін мемлекет бюджетінен қаржыландыруға қажеттілік болмайды деген сөз. Бұдан бөлек, жобаны жүзеге асыру жаңа жұмыс орындарын ашуға да сеп болады. Мәселен, қазірге дейін 1 200 қазақстандық ақылы жолда екі қолға бір күрек тауып отыр», – деді ИИДМ баспасөз қызметі.Елдос СЕНБАЙ