Ақмолада әлі күнге мектеп мәселесінің түйіні тарқамай тұр. Бірқатар ауылда әлі күнге дейін үш ауысымда оқытуға мәжбүр. Өйткені орын жетпейтін немесе апаттық жағдайдағы мектептердің орнына жаңа мектеп салу мәселесі шешілмеген. Облыс әкімімен кездесу кезінде аталған мәселе тағы көтерілді. Бірақ өзекті жағдайдың түйіні тарқатылатын уақыттың ауылы әлі алыста сияқты. Әкім апатты жағдайдағы және үш ауысымда оқытатын мектептер мәселесін біртіндеп қана шешуді жүзеге асырмақ. Ол үшін биыл төрт жалпы білім беретін мектеп пен екі қосымша мектеп құрылысын салуды аяқтау жоспарланған.
Өткен жылы талайдан бері тозығы жетіп, құлағалы тұрған Жарқайың ауданындағы Крупское ауылындағы апатты мектепке күрделі жөндеу жүргізілген. Ал қалған екі мектептің құрылысы жаңа білім ордасын салғанда ғана барып шешімін таппақ. Біржан сал ауданындағы Бұланды ауылындағы балалар бірнеше жылдан бері 12 шақырым қашықтықтағы Макинск ауылына қатынап оқуға мәжбүр. Қыстың қытымыр аязы мен жауын-шашынында жолдың нашарлығынан ауыл балалары әбден қиналады. Ал ауылдағы апатты жағдайдағы мектеп қабырғалары қақырап, терезелері сынып, ғимарат қаңырап бос қалған. Жаңа мектеп салуға 2019 жылы тапсырыс берілгенімен, әлі күнге қазығы да қағылмаған. Өткен жылы басталуы тиіс болғанымен, жобалық-сметалық құжаттамаларында жөнсіздіктердің салдарынан құрылыс басталмаған. – Бізде мектеп құрылысын салуға қыруар қаражат бөлінді. Қыстыгүні қалың қардан көп жағдайда жолдарымызды қар басып, қарға адым аяңдау мұңға айналады. Тіпті, сыртқы әлеммен мүлде байланыссыз қалатын кездеріміз аз болмайды. Ауылда мектеп мұғалімдері өте мықты. Бірақ жаңа мектеп салу мәселесі әлі шешімін табар емес. Былтыр бітіреміз деп уәде еткен. Бірақ әлі де жобасы аяқталмапты. Балаларымызды көрші ауылдың мектебіне апару өте қиын. Өйткені Бұланды мен Макинск аралығындағы автомагистральды трассасында жол апаты жиі болады. Мәселенің тезірек шешілуін қалаймыз, – дейді Бұланды ауылының тұрғындары. Ал есептік кездесуде аталған мәселеге тоқталған өңір басшысының айтуынша, бұл мектептердің құрылысы биыл да бітпейтін түрі бар. «Біржан сал ауданындағы Бұланды орта мектебінің апатты жағдайда болуына байланысты жаңа мектеп құрылысының жобасы әзірленіп жатыр. Сонымен қатар Фурманов орта мектебінің де құрылысына жобалық-сметалық құжаттама жасау әзірленуде. Үш ауысымды мектептер мәселесін шешу үшін Целиноград ауданында Қоянды, Қажымұқан, Қарамеңді ауылдарында 1 620 орын және Көкшетау қаласында №6 және №13 орта мектептердің жанынан 720 орындық ғимараттардың құрылысы салынып жатыр. Қосшы, Раздольное ауылдары мен Аршалы ауданының Жібек жолы және Жалтыркөл ауылдарында 1 880 орындық 4 мектептің құрылысы жүреді. Ал 960 орынға арналған Көкшетау қаласындағы №1 және №4 орта мектептеріндегі 2 қосымша оқу ғимараттарының құрылысы аяқталды, – деді облыс әкімі Ермек Маржықпаев. Өңір басшысының айтуынша, апатты жағдайдағы мектептер мен үш ауысымды мектептер мәселесін түбегейлі шешу үшін ақмолалықтар әлі 2 жыл күтуі керек. Ал облыста білім берудегі аталған мәселені шешуге қомақты қаражат та бөлініпті. Облыста тек былтырдың өзінде «Ауыл – ел бесігі» және «Жұмыспен қамту жол картасы» мемлекеттік бағдарламаларымен 10 млрд теңге бөлініп, 147 білім ордасына түрлі деңгейдегі жөндеу жүргізілген. Дегенмен бұл қаражат облыстағы үш ауысымды оқыту және апатты жағдайдағы мектептер мәселесін шешуге жетпей қалыпты...Абзал АЛПЫСБАЙҰЛЫ, Ақмола облысы