Мәжіліс депутаттары, Nur Otan партиясы фракциясы мүшелері Абай Тасболатов пен Петр Шарапаев Петропавлда «2020 жылға дейін өңірлерді дамыту» бағдарламасы бойынша жөнделген тұрғын үйлерді аралады. Олар алдымен «Нұрлы жер» бағдарламасы бойынша салынған «Береке» шағын ауданындағы 100 пәтерлі тұрғын үйге барды.
Аталған кешеннің құрылысымен «Құрылыс Сервис СК» ЖШС компаниясы айналысқан. Тұрғын үй желтоқсан айында пайдалануға берілді. Үй аумағында автотұрақ орындары мен балалар ойын алаңы бар.
Қазіргі таңда қалада 1 086 көпқабатты тұрғын үй болса, оның 80-нен астамы қайта жөндеуді қажет етеді екен. Сонымен қатар тұрғын үйлердегі 120 лифт ескірген. Алайда жөндеу жұмыстарын жүргізу үшін қалалық бюджетте бар қайтарымды қаражат жеткіліксіз болып отыр. Депутат Петр Шарапаев бұл мәселенің қазіргі таңда өзекті болып отырғанын айтты. Ол сонымен қатар мемлекет жауап беретін және тұрғындар жауап беретін жауапкершілікті нақты бөліп қарастыру керек екенін тілге тиек етті.
– Бұрын ПИК бірнеше үйді қамти алатын, ал қазір жаңа заң жобасы бойынша жеке үй – бұл мүліктің жеке меншік иелері. Олар тек пәтер сатып алып қана қоймай, сонымен қатар барлық үйдің жылумен, сумен қамтамасыз етілуін, үйдің жанында не болып жатқанын қадағалауы тиіс. Лифттерді жөндеу және ауыстыру кезінде мемлекет зейнеткерлерге, аз қамтылған отбасыларға, көпбалалы отбасыларға көмек көрсетеді, – деді ол.
Мәжілісмендер Кәрібай Мұсырман мен Сергей Звольский қаладағы тұрғын үйлерге жүргізілген жөндеу жұмыстарының сапасымен танысып, тұрғындармен әңгімелесіп, облыс орталығындағы жалға берілетін-коммуналдық тұрғын үй құрылысының жағдайына қанықты.
– СҚО-да 14 мыңнан астам адам баспана кезегінде тұр. Тұрғындардың тілегі – тезірек үйлі болу. Сондықтан қазіргі кезде мұндай тұрғын үйлерді барынша көбірек салған жөн. Бастысы, тұрғын үйлердің жылу және ауызсумен толық қамтылуын, барлық қажетті коммуникациялардың жеткілікті болуын, ойын алаңдары мен кірме жолдардың сапалы етіп салынуын қадағалау керек , – дейді Сергей Звольский.
Әбілмансұр ЖАСАН