«Қазақконцерт» мемлекеттік концерттік ұйымының Astana musical мемлекеттік театры 30-31 қаңтар күндері елордадағы «Қазақстан» орталық концерт залында «Шаңырақ» атты жаңа эксперименттік музыкалық перформансын ұсынады.
«Шаңырақ» – бұл жаңа бағыттағы эксперименттік музыкалық перформанс. Барлық көріністер қазақ халқы үшін бірліктің символы – киіз үйдің ішінде сахналанады. Қойылым идеясы мен сюжеті бүгінгі таңда көкейкесті.
«Шаңырақ» перформансында Ұлы дала елінің мәңгілік құндылықтары тамаша көрініс тапқан. Олар – ұлттық музыкалық өнер, ежелден келе жатқан әдет-ғұрып, уақыт сынынан өткен салт-дәстүр. Музыкалық спектакльде адам өмірінің тал бесіктен жер бесікке дейінгі сәттерін қазақтың салт-дәстүрімен шебер байланыстырған. Кейіпкерлердің ішкі сезімдері музыкалық ария, дуэт, трио, хор арқылы ерекше жанрда жеткізілді. Сахналық қойылымның әр кезеңі халық әндерімен әрленіп, музыкалық аспаптармен сүйемелденіп, заманауи хореографиямен үйлесім табады.
«Қазақконцерт» мемлекеттік концерттік ұйымының директоры Жеңіс Сейдуллаұлының айтуынша, «Шаңырақ» перформансы ұлт руханиятының жаңғыруына зор үлес қосатын қойылым.
– Қазақ халқы үшін шаңырақ – қастерлі де қасиетті ұғым. Бүгін талантты жастар «Шаңырақ» туындысын сахналап, қазақ музыкалық өнерінің қара шаңырағы – «Қазақконцерттің» 60 жылдық мерейтойы мен Жастар жылы аясында керемет тарту жасады. Ұлттық құндылықтарымызды қадір тұтқан өнерпаз жастар көпшілікке рухани азық сыйлап, заман көшімен жалғасып, бүгінге жеткен салт-дәстүр, әдеп-ғұрыптың қайта жаңғыруына үлес қосты, – деді ол.
Музыкалық перформанстың алдын ала көрсетілімі былтыр қазан айының соңында өткен. Оқырманға түсінікті болу үшін анықтама бере кетсек, перформанс – көпшілік алдында өнер мен өнерден тыс нәрседен синтездеу арқылы жасалатын туынды. Перформанстың басты белгілері – эпатаж, қабылданған қалыптан өзгеше дүние. 1970 жылдары пайда болған пост модернизм ағымына жатады.
Эксперименттік музыкалық перформанстың режиссері – Astana musical театрының көркемдік жетекшісі Есләм Нұртазин. Либретто авторы – белгілі драматург Әннас Бағдат, композиторы – Болатбек Нұрқасымов.
Айдана БЕГІМ