Жергілікті әкімдік сыйлаған пәтерінен айырылып қалған зілтемірші Айдар Қазовтың үй мәселесін шеше алмай жүргеніне біраз жылдың жүзі болды. Сол аралықта спортшының ашпаған есігі, баспаған табалдырығы қалмаған. Бүгінде әлемдік сайыста атой салып, көк туымызды көкке желбіреткен зілтемірші Айдар Қазов әділдік іздеп жүр.
Мәселенің мән-жайы көпке түсінікті болуы үшін бәрін басынан баяндайық. 2015 жылы зілтемірші Айдар Қазов ауыр атлетикадан Тайландта өткен Азия чемпионатында Қазақстан құрамасының қоржынына алтын медаль салып, дүбірлі додада еліміздің атын әлемге әйгіледі. Сол жарыстан соң Айдарды жерлестері үлкен қошеметпен қарсы алып, құрмет көрсеткен болатын. Көп өтпей, 2016 жылы сол кездегі Солтүстік Қазақстан облысының әкімі Ерік Сұлтанов Азия чемпионына айтулы жетістігі үшін «Жас өркен» шағынауданындағы «Мечта» тұрғын үй кешенінен екі бөлмелі пәтердің кілтін табыстады. Алайда спортшының қуанышы ұзаққа созыла қоймады. 2018 жылдың шілдесінде құрылыс компаниясының басшысы сөзінен тайып, спортшыға басқа ұсыныс жасады. Жасөркен шағынауданындағы үйден бас тартып, Қызылжар тұрғын үй кешеніндегі баспанаға көшу туралы ұсыныс айтады. Кәсіпкер сонда баспананың құжатын бірден рәсімдеуге септесемін деп уәдесін берген. Айдар екінші үйге көшіп, оған жөндеу жұмыстарын жүргізеді. Алайда «Қазградстрой» компаниясының директоры бұл жолы да оны сан соқтырып кеткен. Болған жайды зілтемірші былайша баяндап берді. – 2016 жылы облыс әкімі Ерік Сұлтанов «Казградострой» құрылыс компаниясы салған «Мечта» тұрғын үй кешенінен 2 бөлмелі пәтердің кілтін табыстады. Салтанатты рәсім сол жерде өтті. Пәтерді өз атыма жазып, меншік иесі атану үшін құжаттарды рәсімдеу керек болды. Құрылыс компаниясының директоры Александр Авдеев жылжымайтын мүліктің банкте кепілде тұрғанын, жуық арада оны кепілден шығаратынын, сол кезде пәтерді менің атыма рәсімдеуге болатынын айтып сендірді. Осылайша, біраз уақыт өтті. Ал 2018 жылдың шілдесінде маған пәтерді айырбастауға ұсыныс жасады. «Қызылжар» тұрғын үй кешеніне көшсем, ондағы пәтерді бірден менің атыма рәсімдеуге болатынын айтты. Сөзіне сендім. Көштім. Сылақпен ғана тапсырылған үй болатын. Жөндеу жұмыстарын өзім жүргіздім. Авдеев пәтерді рәсімдеуден қашқақтап, түрлі сылтау айта берді. Осылайша, мүлікті өз атыма аудара алмадым, – дейді ауыр атлетикадан Азия чемпионы. Ал ең өкініштісі, араға бірнеше ай уақыт салып құрылыс компаниясының директоры Айдарға берілген екінші пәтерді сатып жіберген. Ол кезде спортшы басқа қалада оқу-жаттығу жиынында жүргенін айтады. Құқық қорғау органдарының өкілдері спортшының қарындасы Альфияның қолына 10 күн ішінде үйді босату жөніндегі ескерту хабарламаны ұстатып кеткен. Кейін Айдар бірден туған жеріне оралып, мәселенің мән-жайын білуге тырысқан. Бірақ ешкімнен тұшымды жауап ала алмапты. Спортшы тек тиісті мекемелерге өтініш жазып, баспанада жылыту маусымы аяқталғанға дейін тұра тұруға ғана рұқсат ала алған. Кейін оған Петропавл қалалық әкімдігі Азия чемпионына Қазақстан Конституциясы көшесіндегі ескі үйлердің бірінен қызметтік 1 бөлмелі үй береді. Алайда нысан ішінде не су, не жарық болмаған. Оның барлығы коммуналдық қызмет ақысы төленбегендіктен ажыратылыпты. – Көршілердің айтуынша, пәтерде жалғызілікті ер адам тұрыпты. Туған-туыстары болмаған. Ол қайтыс болғаннан кейін мүлік әкімдік меншігіне өткен. Пәтерде әкімдік қызметкері тұрыпты. Қарыздарын өтемеген. Сондықтан коммуналдық компаниялар белшесінен қарызға батқан тұрғынға қызмет көрсетуді тоқтатқан. Олар да тегін жұмыс істемейді. Қарыздың бір бөлігін әкімшілік жапты, қалғанын өздерің жабасыңдар деді, – дейді Айдардың қарындасы Альфия. Қазір пәтер бос тұр. Спортшы одан мүлде бас тартқан. Себебі ол мүлікті жекешелендіре алмайды екен. Айдар осы уақытқа дейін бұл мәселе жайында ешкімге шағымданбаған. Бір сөзінде зілтемірші Петропавл қаласының әкімі Болат Жұмабековке жолдаған сауалдары да жауапсыз қалғанын, баспасөз қызметінің «ресми сұрау жіберіңдер» деген талабын да орындағанын, жауап күтіп жүргенін айтып қалды.2016 жылы сол кездегі Солтүстік Қазақстан облысының әкімі Ерік Сұлтанов Азия чемпионына айтулы жетістігі үшін «Жас өркен» шағынауданындағы «Мечта» тұрғын үй кешенінен екі бөлмелі пәтердің кілтін табыстады. Алайда спортшының қуанышы ұзаққа созыла қоймады.
Бұл мәселе жөнінде Петропавл қаласы әкімінің орынбасары Асқар Хабибулин былайша жауап берді. – 2016 жылы «Казгродострой-НС» құрылыс компаниясының директоры Авдеев пен Қазов арасында келісім болған. Спортшыға баспана берілді, алайда қалыптасқан экономикалық жағдайға байланысты Авдеев өз шешімін өзгертті. Оған әкімдіктің ешқандай қатысы жоқ. 2019 жылы облыстық Спорт басқармасынан Қазовқа қызметтік пәтер беру жөніндегі өтінішхат түсті. Мәселе тұрғын үй жөніндегі комиссия отырысында қаралды. Айдар Қазовқа жекешелендіру құқығынсыз 1 бөлмелі пәтер беру жөнінде шешім қабылданды. Заңға сәйкес, Олимпиада, Паралимпиада, Сурдлимпиада чемпиондары мен жүлдегерлері ғана меншік иесі атана алады. Айдар ол санатқа жатпайды. Сондықтан жылжымайтын мүлікті өз атына аудара алмайды, – дейді Петропавл қаласы әкімінің орынбасары. Сонымен қатар Асқар Хабибулин 2016 жылы жұмыс істеген мамандардың, басшылықтың ауысып кеткенін, ол кездегі мәселенің мәнінен бейхабар екенін айтып ақталды. Ал осы іске қатысты Александр Авдеевтің өзі былай деп жауап берді. – Ол пәтер басқалары сияқты Петропавл қаласы әкімдігімен арадағы келісім кепілі ретінде банкте тұрды. Әкімдік бастамасымен келісімнің үзілуіне байланысты ақшаны банктен қайтарып алды. Банк пәтерді аукционға қойып, сатып жіберді. Осылайша, Қазовтың пәтері сатылып кетті. Ол үшін әкімдікке «рақмет» айту керек. Спортшыға пәтерді облыс әкімі сыйлады. Мен онда болған да жоқпын. Ол бастапқыда-ақ банкте кепілде тұрды. Облыс басшылығы барлығынан хабардар болды. Әкімдік ескі үйлерді сүру, маңайды абаттандыру, комуналдық желілерге қосылуға кеткен шығындарды өтеуге тиіс еді. Бірақ олай болмады. Осындай жайттардың кесірінен компания банкротқа ұшырады. Қазір бірнеше сот отырысы өтіп жатыр. Кімдікі дұрыс, кімдікі бұрыс екенін уақыт көрсетеді. Спортшыға шынымен обал болды. Әкімдік бергенін алып қойды. Оған ештеңе істей алмаймыз, – дейді Александр Авдеев. Бір сөзбен айтқанда, кәсіпкердің әкімдікке өкпесі қара қазандай. Ол өзінің де, спортшының да тығырыққа тірелуіне мемлекеттік органды айыптап отыр. Ал Петропавл қалалық әкімдігі банкротқа ұшыраған құрылыс компаниясын айыптады. Осының бәрінен шаршаған зілтемірші қазір кәсіби спорттан кету туралы да ойлап жүргенін жасырмады. Әкімдердің халық алдында көзбояушылықпен беріп, кейін тартып алған пәтері мен құрғақ уәдесі спортшының шамына тиген болса керек. Болған жайттардан кейін Айдар бастапқы баспанадан үмітін үзген. Әкімдіктің жауабын күтіп жүрген спортшы бұл істің қай уақытқа дейін созылатынынан да бейхабар. Ендігі кезекте құрғақ уәдемен уақыт созбай, ауыр атлетикадан ел үміті саналған саңлағымызға қолдау көрсетілсе дейміз. Қалай дегенмен спортшыға жасалған қиянат жақсылық әкелмесі анық.Абылайхан ЖҰМАШ