Абайдың 175 жылдық мерейтойы аясында атқарылатын маңызды жобалардың бірі – шығармалар жинағын шетелдің 10 тіліне аудару және шығару.
«Абайдың шет тіліне аударылған жинақтары облыс орталықтары мен республика көлеміндегі барлық кітапханаларда тұратын болады. Шет тіліне аударылған жинақтарды халыққа көрсету мақсатында жұмыстар жүргізіледі» дейді Мәдениет және спорт вице-министрі Нұрғиса Дәуешов.
Жинақтардың электронды нұсқасы да шығарылмақ. Яғни, шет тіліне аударылған жинақтар қағаз күйінде де, электронды нұсқада да болады. Интернет-нұсқа жастардың Абай шығармаларымен танысуына мүмкіндік жасамақ.
Мемлекет басшысы Қасым-Жомарт Тоқаевтың Жарлығымен Абайдың 175 жылдық мерейтойын дайындау және өткізу жөніндегі мемлекеттік комиссияның құрамы бекітілген болатын. Олардың ішінде ірі халықаралық және республикалық қоғамдық маңызы бар, ғылыми, ағартушылық іс-шаралар, конференциялар, симпозиумдар, дөңгелек үстелдер, сынып сағаттары, поэтикалық және әдеби конкурстар, баспасөз турлары және өзге де іс-шаралар бар.
Айна ХАСАН