«Nur Otan» партиясы Алматы облыстық филиалының 2020 жылы атқарған жұмыс қорытындысы бойынша аудан-қалалық партия филиалы басшылығымен жиын өтті.
Карантин талаптарына сай, жиын аудан-қалалық филиалдардың мамандары, облыстық, аудан-қалалық партиялық бақылау комиссияларының және сыбайлас жемқорлыққа қарсы іс-қимыл қоғамдық кеңес төрағалары онлайн режимде қатысты. Алматы облыстық партия филиалы төрағасының бірінші орынбасары Г.Тойлыбаеваның төрағалығымен өткен шара барысында 2020 жылғы атқарылған жұмыстар сараланып, филиал төрағаларының орынбасарлары С.Нұрқадыров және А.Кубентаев облыс көлеміндегі жұмыстарды баяндап өтті. Гүлнәр Тойлыбаева алғысөзінде: «Өздеріңізге белгілі, биыл тұңғыш рет Елбасы, партия Төрағасы Нұрсұлтан Назарбаевтың бастамасымен елімізде партияішілік праймериз ұйымдастырылып, кандидаттарға іріктеу жүргізілді. Праймериз кезеңінде тұрғындар арасында сайлауалды бағдарламамыздың жобасы талқыланып, елдің өтініш-тілектері, аманаттары жинақталып, кеңінен насихатталды. Сайлау кезеңінде кандидаттарымыз, сенімді өкілдер мен белсенді жасотандықтар сайлаушылар арасында үгіт-насихат жұмыстарын жүргізіп, белсенділік танытты. Алматы облысына барлық деңгейдегі мәслихаттарда 360 мандат болса, соның 304 мандатына «Nur Otan» партиясы ие болды. Барлықтарыңыздың қосқан еңбектеріңіз үшін алғыс білдіремін!» деп атап өтті. Шара барысында 2020 жылы «Jas Otan» Жастар қанатының атқарылған жұмыстары жөнінде облыстық «Jas Otan» Жастар қанатының төрағасы Е.Ақболатов, Жамбыл, Қарасай, Балқаш аудандық партия филиалы төрағаларының бірінші орынбасарлары Ы.Амалбек, Қ.Айтжанов, Д.Садықбаев сөз алып, атқарған жұмыстары жайлы есептерін беріп, қорытындысында жыл көлемінде нәтижелі жұмыс көрсеткен Ақсу, Еңбекшіқазақ, Сарқан аудандық филиал басшылығына облыс әкімі, облыстық партия филиалының төрағасы А.Баталовтың алғысхаты табысталды. Жиынды қорытындылаған Гүлнәр Тойлыбаева аудан-қалалық партия филиалдарына бірқатар тапсырма беріп, биыл Тәуелсіздігіміздің 30 жылдық мерекесінде еліміздің жетістіктерін насихаттап, сайлауалды бағдарламаның нақты шаралары нәтижелі іске асуында белсенді жұмыс атқару қажет екенін атап өтті.Әбілмансұр ЖАСАН