Нұр-Сұлтан қаласында «Медициналық пойыз» жобасының үздік қызметкерлерін салтанатты марапаттау рәсімі өтті. «Самұрық-Қазына» ұлттық әл-ауқат қорының басшысы Ахметжан Есімов пен Денсаулық сақтау министрі Елжан Біртанов дәрігерлерге құрмет грамоталарын тапсырды.
Айта кету керек, «Медициналық пойыз» жобасын Денсаулық сақтау министрлігінің қолдауымен «Самұрық-Қазына» қоры жүзеге асырып жатыр. Жобаның мақсаты – шалғай аудандардың халқын тегін медициналық-санитарлық және консультациялық-диагностикалық көмекпен қамтамасыз ету. Биыл заманауи диагностикалық жабдықтармен жарақталған «Денсаулық» және «Жәрдем» медициналық пойыздары дәрігерлік көмек көрсетті. Жұмыс барысында 238 жоғары білікті дәрігер қиян түкпірдегі 67 мыңнан астам тұрғынға емдеу-консультациялық қызмет көрсетті, оның 11 мыңнан астамы – балалар. 273 елді мекенді аралаған медициналық пойыздарда жиыны 209 249 дәрігерлік қабылдау шарасы атқарылды. Жолдың жалпы ұзындығы 29 203 шақырым болды.
2018 жылы «Медициналық пойыз» жобасы 124 бекетті қамтып, 42 306 тұрғынға медициналық көмек көрсетілген еді. Ал дәрігерлік қабылдауда болған азаматтардың жалпы саны 192 мыңнан асқан болатын.
Дәрігерлердің айтуынша, медициналық пойыздар елімізді аралаған кезде онкологиялық аурулар, пневмония, несеп-қуық жолдарына, өтке тас жиналу, жүрек-қантамыр жүйесі ауруларының кең тарағаны байқалыпты. Көру қабілеті бұзылған, қант диабетіне, бронх демікпесі мен асқазан жарасына шалдыққан науқастар да өте көп екен.
«Самұрық-Қазына» қорының басқарма төрағасы Ахметжан Есімов дәрігерлерді жобаның кезекті маусымының аяқталуымен құттықтап, медициналық қызметтердің сапасы мен қолжетімділігін қамтамасыз ету маңызды мәселе болып қала беретінін айтты.
– Соңғы 5 жылда әлеуметтік маңызды жобаларға «Самұрық-Қазына» қоры 60 миллиард теңгеден астам қаржы бөлді, 1 миллионнан астам адам қамтылды. Осы жобаларды іске асыра отырып, біз азаматтардың өмір сүру сапасын арттыруға, адамдардың медицина мен білімге қол жеткізуіне тырысамыз. «Медициналық пойыз» жобасы еліміздің шалғай өңірлері тұрғындарына сапалы медициналық көмек алуға мүмкіндік береді», – деді Ахметжан Есімов.
Өз кезегінде Денсаулық сақтау министрі ұйымдастырушыларға алғыс білдіріп, жоба барысында әрбір дәрігердің ерен еңбек сіңіргенін ерекше атап өтті.
«Самұрық-Қазына» қорының құрмет грамотасымен «Медициналық пойыз» жобасының дамуына үлес қосқан 15 маман марапатталды. Оларға 200 мың теңгеден ақшалай сертификаттар табысталды.
Ерсайын БАҒДАТ