Биыл «Астана мюзикл» театры балаларға тосынсый әзірледі. Оларға наурыз-шашу ретінде «ЕНТ тапсырмаймын», «Шаңырақ», COVID, «Наурызбектің оқиғасы» интерактивтік шоуы, «№13», «Ақбілек» сияқты қойылымдарды ұсынады.
Театр өкілдерінің айтуынша, қойылымдардың ішіндегі ерекшесі – «Наурызбектің оқиғасы». Бұл – балаларға арналған интерактивті ертегі. Жаңа форматтағы туындыда көрермендер қойылым кейіпкерлерімен интерактивті байланысқа түсіп, қызықты оқиғалардың тікелей қатысушысына айналады. Ертегінің мақсаты – Тор, Джокер, Дэдбул, Эльза секілді заманауи кейіпкерлер мен Тазша бала, Таусоғар сынды ежелгі қазақ ертегілерінің қаһармандарымен кездестіріп, жас көрермендердің тарихымызға, салт-дәстүрімізге деген қызығушылығын арттыру.
Балаларға арналған премьера 14 наурыз – Көрісу күні бастау алады. Спектакльді тамашалауға келген балаларға қазақтың ұлттық тағамдары негізінде жасалған тәтті сыйлықтар да табысталмақ.
А.ЖОЛДАС
