Алматыда Gaalipata-2 атты үнді фильмі түсіріліп жатыр. Екі студент арасындағы махаббатты көрсететін фильмнің екінші маусымы мегаполистің ең әдемі жерлерінде таспаланады.
Телеарналар таратқан мәлімет бойынша, Gaalipata-2 – романтикалық комедияның жалғасы. Бірақ екінші бөлімдегі көріністердің жартысына жуығы Алматы мен Алматы облысында түсіріледі. Фильм режиссері – Йогарадж Бхат. Ол көрерменге Қазақстан табиғатының бар сұлулығын көрсету үшін ең әдемі жерлерді таңдап алған. Режиссердің айтуынша, фильм басынан бастап көрерменді қызықтырады. Хикая желісіне келсек, бала кезден бірге өскен достар – Ганеш, Дигант пен Китти бір аруға ғашық болып қалады. Оқиға Үндістанда басталып, Қазақстанда жалғасады. Фильм түсірілімі Шарын шатқалында, Шымбұлақта, 28-панфиловшылар саябағында өткен. Авторлар туындының сценарийін ұзақ уақыт бойы жазған. Басты рөлдегі кейіпкер Вайбхави Шандилья Қазақстанның сұлулығына тәнті болған деседі. Gaalipata-2 романтикалық комедиясының түсірілімі аяқталуға жақын. Фильм көрерменге жаздың соңында жол тартады.А.АЙДАРҚЫЗЫ