Қалың қар еріп, қатты жауған жауыннан Миялы, Сағыз, Жангелдин, Ойыл, Көздіғара, Жамбыл, Қызылқоға ауылдық округтерінде кейбір көшені су басып, тұрғын үйлерге су кіріп кету қаупі төнді. Тілсіз жау тіпті уақытша салынған көпірді бұза жарып, ауыл тұрғындарын үрейлендіріп тастады.
Ақтөбе облысынан бастау алып, Сағыз ауылының ішінен өтіп, «Қоңырсай» өзеніне құйылатын «Ноғайты» өзенінің деңгейі толассыз жауған нөсер жаңбыр салдарынан көтеріліп, Қызылқоға ауданының сегіз мыңға жуық тұрғыны бар ауылына қауіп төндірді. Қызылқоға ауданы әкімінің орынбасары Жарас Есенғалиевтің айтуынша, төтенше жағдайды жою мақсатында аудан әкімінің 2021 жылғы 25 наурыздағы №69 «Табиғи сипаттағы төтенше жағдайларды жою жөніндегі аудандық жедел штаб құру туралы» өкімімен аудандық жедел штаб құрылды. Кешеден бастап кезекшілік ұйымдастырылып, жедел штаб аудандағы күш-құралдарды іске қосып, 2 вакуум КамАЗ, 1 тиегіш экскаватор, 1 ГАЗ-66 ямобур, 1 Урал самосвалы, 5 мотопомпа және 35 адамнан құралған жеке құрам жұмылдырылған. Әрбір үйдің ауласына жиналған суларды арнайы техникалармен сору жұмыстары жүргізілуде. Қауіп төніп тұрған тұрғын үйлер айналасына қапшықтарға топырақ толтырылып, бөгеттер соғылып жатыр. Апатқа ұшыраған тұрғын үйлер мен әлеуметтік нысандар жоқ. Сонымен қатар аудан әкімінің орынбасары судың Сағыз ауылынан 1 шақырым қашықтықта Ақтөбе –Атырау тасжолының айналма жол бойында уақытша салынған көпір үстінен өтуіне байланысты мәлімдеме жасады. – 25 наурыз күні «Ноғайты» өзені қардың күрт еруі салдарынан қатты деңгейде келіп, Сағыз ауылынан 1 шақырым қашықтықта Ақтөбе – Атырау тасжолының айналма жол бойында уақытша салынған көпір үстінен өтіп кеткен. «ШанхайКонстракшнГрупп» ЖШС-нің техникаларымен көпірді су деңгейінен биіктетіп, қалпына келтіру жұмыстары жүргізіліп, таңертеңгілік уақытша көпір үстімен көлік қозғалысы қалпына келтірілді. Әзірге қауіп жоқ, – деді Жарас Есенғалиев. Қатты ағынмен шайып өткен уақытша айналма көпірге 100 тонна топырақ және 160 тонна қиыршық тас төгіп, көпірдің екі жағын бөгеу жұмыстары жүргізілген. Қазір судың деңгейі түсіп, қауіп сейілді. Дегенмен ауыл тұрғындары тілсіз жау ескертіп келмейтінін ескеріп, жергілікті билік тарапынан бақылау мен бөгеттерді бекітуді сұрап отыр.Тұрсын ЖҰМАБЕКҚЫЗЫ, Атырау облысы