Көкшетаудың дәл түбінде Садовое деген шағын ауыл бар. Ауыл дегенмен қалаға тиіп тұрғандықтан, көпшілік оны облыс орталығының бір шағынауданы деп те есептейді. Бірақ жұртшылық жолдың азабын жиі айтады. Жырым-жырым болған жолдардың жайы әлеуметтік желілерде де талай көтерілген. Дегенмен былтыр ғана тегістеліп, ағымдағы жөндеу жасалған тасжол қазір қайта таз қалпына түсіпті.
20 миллион теңге қайда кетті?
Садовое селосы Көкшетаудан 15 шақырым ғана қашықтықта орналасқан. Мыңға жуық түтін тұратын ауыл тұрғындарының басым бөлігі Көкшетауда еңбек етеді. Ауылда Milk Projekt жауапкершілігі шектеулі серіктестігіне тиесілі сүт зауыты бар. Тұрғындардың айтуынша, Көкшетау–Қостанай күре жолына шығатын бір жарым шақырым жолды осы кәсіпорынға тиесілі үш-төрт жүк көлігі жырымдайды. Онымен қоса, әкімнің есебінде ауыз толтырып айтқан жөндеу жұмыстарының шын мәнінде бірі де жасалмағанын айтады тұрғындар. «Садовое селосындағы бұл жолға жобалық-сметалық құжаттамаға сәйкес, 20 миллион теңгеге жуық, нақты айтсақ, 19 417 246,24 теңге бөлінген. Бұл қаражатқа Садовое селосынан бастап Көкшетау–Қостанай күре жолына дейінгі аралықтағы жолдардың шұқырын тегістеу, сондай-ақ Садовое селосындағы ішкі көшелерді де жөндеу көзделген. Қағаз жүзінде өз есептерінде мұның бәрін толықтай көрсеткен. Бірақ жөндеу Садовое селосындағы кіреберістегі алғашқы үйлерге дейін ғана жетті. Бізге келіп, жаңа асфальттың ең жақсы деген 50 метрдей учаскесін ғана суретке түсіріп кетті. Мұның бәрін сол жерде көлігіммен өтіп бара жатқанымда байқап, арнайы тоқтап, істеп тұрған тірліктерін көзіммен көрдім. 20 миллионға жуық қаражат құйып жасаған жұмыстары мүлде іске алғысыз болды. Екі апта өтпестен-ақ ойдым-ойдым шұңқырлар қайтадан сол қалпына түсті. Ал ауыл көшелеріне жөндеу мүлде жасалған да жоқ...», – дейді Садовое селосының тұрғыны Сафиолла Сапаров. Ауыл тұрғындарының айтуынша, ауылдық округ пен аудан әкімдері мұнда жылдам ауысады. Бірақ қанша әкім ауысса да, ауыл үшін еш нәтижесі бола қоймады.Жолды сапасыз жасағаны үшін хат та жіберілмепті
Мәселені дереу аталған мамандардың өз аузынан естімек болып, тиісті сала басшысымен тілдестік. Бірақ 20 миллион теңгеге салынған жолды сапасыз әлі толық аяқтамаған мердігер компанияға түзету үшін әлі хат та жазылмапты. «Ағымдағы жөндеу жұмыстарын «Каз Арм строй» жауапкершілігі шектеулі серіктестігі жүргізген. Қазір жолда қар жатқандықтан, әлі жаңа ери бастағандықтан, әзірге еш жұмыс жүргізе алмаймыз. Біз жақын арада мердігер компанияға жұмыстың дұрыс жүргізілмегеніне байланысты акт әзірлеп, хат жібереміз. Олар жолға жөндеу жұмыстары бойынша кепілді бір жыл мерзім біткенше жолды қайта қалпына келтіруге міндетті. Сәуірдің 15-іне таман жұмысты қайта бастаймыз», – дейді Зеренді ауданы тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Марат Жүнісов. Сапасыз салынған жол кепілдік мерзімі ішінде қайта қалпына келтіріледі дейді әкімдіктің тиісті сала басшылары. Ал есіл уақыт пен қаражаттың, ауыл жұртын алаңдатқан басқа да жайлардың қашан шешілері бір Аллаға аян...Абзал АЛПЫСБАЙҰЛЫ, Ақмола облысы