Рудный қаласындағы колледжде оқитын 17 жастағы студент өзі жалдап тұратын пәтерде есікке асылып қалған, - деп хабарлады Tobolinfo.kz.
Оқиға 19 наурызда болған. Оқу орнында студенттің екінші курста оқитыны белгілі болды. Ол өзін жақсы жағынан көрсеткен, полицияда есепте тұрмаған, колледждің қоғамдық өміріне белсенді араласқан. Ашық- жарқын бозбаланың бұндай қадамға не үшін барғаны белгісіз.Студент өлер алдында қағаз жазып қалдырған. Онда ата-анасынан өліміне ешкімді кінәламауды, өзін кешіруді сұраған. Жаңа жылға дейін өзіне қол салмақ болғанын жазған. Өйткені кейінгі кездері істеген күнәлары өзіне маза бермепті.
Басылымның жазуынша, студенттің ата-анасы ұлдарын өз-өзіне қол жұмсауға біреу мәжбүрлеген деп есептейді. Жақында студенттің өзі хабарласып, Наурыз мерекесіне орай үйге келетінін айтқан. Алайда марқұмның туыстары бұл мәліметті растаудан бас тартты. ҚР ҚК 105 бабы 3 бөлігі "Өз-өзіне қол жұмсауға мәжбүрлеу" бойынша қылмыстық іс қозғалды.