Кәсіпқой бокс әлемінде тағы бір жаңа жұлдыз пайда болды. Ол – былтыр тамыз айының басында ғана кәсіпқой боксқа ауысқан әлем чемпионы Тұрсынбай Құлахмет есімді қазақ боксшысы.
Отандасымыз күні кеше Дубайда (БАӘ) өткен бокс кешінде сәтті өнер көрсетіп, бірінші орта салмақта WBC International атағын қорғап қалды. Қарсыласы осыған дейін 20 рет жеңіске жетіп, оның 13 кездесуін нокаутпен аяқтаған тәжірибелі венесуэлалық Хебер Рондон болғандықтан, көпшілік бұл кездесудің тартысты өтетіне сеніп, 10 раундтық жекпе-жек күтті. Бірақ спорттық мансабында кәсіпқой бокстағы үшінші кездесуін өткізген қазақстандық боксшы 10 раундқа есептелген жекпе-жектің алғашқы раундында-ақ Рондонды сұлатып салды. Сол айқаста Құлахметтің жеңіске жетуіне небәрі 70 секунд жеткілікті болды. Осы жеңісі үшін боксшымыз орта салмақтағы BoxRec рейтингінде 48-сатыға көтерілді. Кездесуден соң қазақстандық сарапшы Айдар Махметов боксшы Тұрсынбай Құлахметтің венесуэлалық Эбер Рондонмен өткізген жекпе-жегі үшін қанша гонорар алғанын көпшілікке жариялады. – Былғары қолғап шебері Тұрсынбай Құлахмет кәсіби шаршы алаңдағы үшінші жекпе-жегі үшін 210 000 доллар табыс тапты. 70 секунд үшін жақсы табыс! – деп жазды спорт сарапшысы MakhmetovSport Telegram арнасында. Бұл – кәсіпқой бокста үш кездесу өткізген боксшы үшін тамаша жетістік, қомақты қаржы. Біз осы ретте Тұрсынбай Құлахметтің бұған дейінгі өткізген екі кездесуіне шолу жасап көрмекпіз. Ол кәсіби рингтегі алғашқы жекпе-жегін 23 тамыз күні Алматы қаласында өткізіп, онда отандасы Сағадат Рахманқұловты (6-2, 4КО) уақытынан бұрын жеңген болатын. Сөйтіп, Тұрсынбай кәсіпқой бокстағы мансабын сәтті бастады. Одан кейінгі Тұрсынбай Құлахмет пен Маклей Макгоуэн арасындағы кездесу MTK Global және TOP Rank компаниялары ұйымдастырған Йоркширдегі (Англия) бокс кешінің басты жекпе-жегі болды. 10 раундтық айқас тартысты өтті. 7-раундта қазақстандық былғары қолғап шебері қарсыласын нокдаунға жіберді. Алайда ұлыбританиялық боксшы тез есін жиып, кездесуді соңына дейін жалғастырды. Айқас соңында төрешілердің шешімімен бірауыздан Құлахмет жеңімпаз атанды. Кәсіпқой бокстағы екінші жеңісінен-ақ қазақстандық боксшы бірінші орта салмақта WBC International белбеуінің иегері атанды. «Міне, жаңа чемпион! Тұрсынбай Құлахмет өзінің екінші кәсіпқой жекпе-жегінде төрешілердің бірауыздан шығарған шешімімен Маклей Макгоуэнді жеңіп, WBC Халықаралық титулын жеңіп алды. Қазақтың шоқ жұлдызын жарқын болашақ күтіп тұр!» деп жазды MTK Global ресми Twitter-де. Кездесуден соң боксшы да жекпе-жектен алған әсерімен бөлісті. – Мен екінші жекпе-жегімнің Англияда өткеніне қуаныштымын. Бұл – бокстың отаны. Мұнда бокс жыл сайын дамып келеді. Жергілікті жанкүйерлерге жақсы жекпе-жек көрсеттім деп ойлаймын. Екінші жекпе-жегімде WBC белбеуін жеңіп алғаныма қуаныштымын. Құдай қаласа, келесі жылы толық белбеу үшін күресемін, – деп уәде берді. Қазақстандық боксшыны қазір Ұлыбританиядағы беделді мамандардың бірі Джейми Мур жаттықтыратынын айта кеткен ләзім. Ол Карл Фрэмптон, Джек Каттералл, Рокки Филдинг, Стивен Уорд сияқты боксшылармен жұмыс істеген. Сонымен қатар Мур Геннадий Головкиннің бұрынғы қарсыласы Мартин Мюррейді де жаттықтырған. Бүгінде сол тізім ішінде біздің боксшымыздың есімі қатар аталады. Кәсіпқой боксқа ауысқан сәттен бастап MTK Kazakhstan менеджерлік компаниясымен келісімшартқа отырған Құлахмет жөнінде аталмыш менеджерлік компанияның басшысы Асқар Салықбаев әуел баста оң пікірін білдірген. – Тұрсынбай – әуесқой бокстан қазақ елінің үш дүркін чемпионы. Ислам ойындарының және бірқатар халықаралық турнирдің жеңімпазы. 2019 жылғы Азия чемпионы. 2019 жылғы әлем чемпионатының қола жүлдегері. Әуесқой бокста 75 келіге дейінгі салмақ дәрежесінде өнер көрсетті. Ол – өз қатарындағы Қазақстанның ең үздік боксшыларының бірі. Біздің ынтымақтастығымыз нәтижелі және жемісті болып, үлкен жеңістерге бірге жетеміз деп үміттенеміз, – деп боксшыға үлкен сенім артты. Бүгінде сол сенім толықтай ақталуда. Боксшы діттеген мақсатына қадам басып келеді. Оның қазіргі деңгейі, алдағы мүмкіндігі жөнінде PR менеджер, спорт журналисі Серік Ноян айтып берді. – Рингте өзін өте сенімді ұстайды, еркін қимылдайды, аяқпен де жақсы жұмыс істейді. Соққылары да мығым. Көбіне қарсыласын бақылауда ұстап жүріп, оған қысым көрсету арқылы жеңіске жетуге әрекет жасайды. Әр жекпе-жек сайын дами түсетініне еш шүбә келтірмейміз. Болашағынан көп үміт күттіреді. Жасы небәрі 27-де. Үлкен айқастарға шығуына толық мүмкіндік бар. Бірінші орта салмақта мықтылар өте көп. Қазақстандық Садриддин Ахмедов те осы салмақта. Эрисланди Лара, Брайан Карлос Кастаньо, Тим Цзю, Джермалл Чарло секілді үздік боксшылар бар. Тұрсынбай да алдағы уақытта осы қарсыластарымен кездесуді мақсат тұтып отырғаны анық. Ол алдағы 1-2 жылдықта чемпиондық айқастарға толықтай дайын болады деп ойлай- мын, – дейді Серік. Тұрсынбай Құлахмет үшінші кездесуінде де өзінің толық бабында екенін көрсетті, дәлелдеді. Венесуэланың мақтаулы спортшысын қиналмай-ақ, көп күш жұмсамай-ақ жеңді. Әзірге Құлахметтің еншісінде үш жеңіс бар. Бұл бастамасы ғана. Осы мақтаулы жетістіктері оған алдағы кездесулерде үлкен мүмкіндік сыйлап, чемпиондық жекпе-жектерге даңғыл жол ашары сөзсіз.Абылайхан ЖҰМАШ