Сарқан ауданындағы «Сарқан жеміс консервілеу зауыты» жергілікті жерде өсетін жеміс-жидектен тосаптың және шырындар мен сусындардың түр-түрін шығаруды қолға алды. Сонымен бірге басқа елден жеткізілетін апельсин сынды цитрустық жемістерден тұтынуға дайын өнімдер өндіруде.
Жұмысын 2018 жылы бастаған зауыт, содан бері өндіріс желісін қалыптастырып қана қоймай, әр жыл сайын өнім түрлерін көбейтіп, бүгінде оның санын 15-ке жеткізген. Күзде жеміс-жидек жиналып, қайта өңдеу қарқын алған кезеңде кәсіпорын күніне 120 тоннаға дейін өнім шығаруға қауқарлы. Зауыттағы барлық қондырғылар Ресей мен Қытай елінен әкелінген. Жақында зауыт басшылығы бірнеше өнім түрін сынамадан өткізіп, соның нәтижесінде жергілікті алмадан ешқандай қоспасыз дайындалған тосап шығаруды қолға алып, сатылымға SIVERS джем брендімен өз өнімдерін ұсына бастады. «Үш жыл бұрын жұмысқа кіріскенде, өндірісті бір өніммен бастадық. Алмадан шығарған сусынымыз жергілікті тұрғындардың сұранысына ие болғаннан кейін, өнім көлемін жыл сайын арттырып, түрлендіруге кірістік. Біздің мақсатымыз – отандық өнімге деген сұранысты қалыптастыру. Сондай-ақ алыс-жақын шетелдерге де өнімдерімізді экспорттау», – дейді зауыт басшысы Ринат Калиуллин. Кәсіпорындағылар алдағы уақытта алманың жергілікті сортынан шыққан тосап, сусындарын елге кеңінен танымал ететін ерекше дәм жасап, табиғи артықшылығы бар өнім ретінде тұтынушыларға ұсынуға ниетті. Бұл қадам зауыттың одан әрі табысына өз септігін тигізіп, ауданның экономикалық дамуына үлесін қосары анық.
Әлемдегі алмалардың атасы, жабайы алманың отаны – Жоңғар Алатауы екені дәлелденген. Соның бірі осы өңірде өсетін сиверс алмасының дәмі керемет. Сондықтан оны біздің еліміздің брендінің бірі десек болады. Алдағы міндет – алманың осынау жабайы түрін жоғалып кетуден сақтап, түрлерін көбейту. Айта кетейік, сиверс жабайы алмасының гүлденуі кезінде ауданға жыл сайын мыңдаған турист келеді.
Болат АБАҒАН, Алматы облысы