WhatsApp мессенджерінде Toyota компаниясының 100 жылдық мерейтойына орай автокөлік ұтысын өткізіп жатқаны туралы ақпарат тарады. StopFake сайтының хабарлауынша, брендтің Алматы мен Нұр-Сұлтандағы ресми дилері ақпаратты жоққа шығарған.
Toyota-ның Алматы мен Нұр-Сұлтандағы ресми дилері «Астана Моторс» компаниясы ұтыс туралы ақпаратты жоққа шығарды. Сондай-ақ StopFake компанияның 100 жылдық мерейтойы 2037 жылы екенін ескертті. «Желіде Toyota брендінің 100 жылдығына орай сыйлықтар ойнатылатыны туралы жалған хабарлама тарап жатыр. Сіздерді алаяқтардың іс-әрекеттеріне берілмей тек ресми ақпаратқа сенуге шақырамыз. Акциялар, жүлделер ұтысы және т.б. арнайы бағдарламалар туралы ақпарат компанияның ресми ресурстарында жарияланады. Хабарлама мессенджерлер арқылы таратылмайды», – деді компанияның PR қызметі өкілдері. StopFake редакциясы қымбат жүлделерді желідегі белсенділік үшін көбінесе алаяқтар ұсынатынын, шын мәнінде тек жеке деректерді ұрлау үшін жасалатынын жазған. Мұндай кибершабуыл схемасы фишинг деп аталады.А.ЖОЛДАС