Экология министрлігі наурыз айында «Арселор Миттал Теміртау» АҚ конверторлық цехынан ластаушы заттар шығуына байланысты осы кәсіпорынға жоспардан тыс тексеру жүргізген болатын. Себебі ақпан айының соңында әлеуметтік желіде зауыттан қызғылт түтіннің шығып жатқаны туралы бейнеролик пайда болып, көп ұзамай Қарағанды облысы бойынша Экология департаменті атмосфераға зиянды қалдықтар рұқсат етілген нормадан көп таралғанын анықтаған.
Тексеру кезінде Қарағанды облысы бойынша Экология департаментінің комиссиясы «Арселор Миттал Теміртау» АҚ кәсіпорнынан бөлінетін газдарды тазарту жүйесін пайдалану қағидасы бұзылғанын көрген. Яғни, технологиялық жабдықтары әбден ескірген. Осыған байланысты №2 конвертер мамыр айына дейін жұмысын тоқтатып, күрделі жөндеуге жіберіледі. Жалпы, зауыттағы сегіз цехтың жетеуінен ақау шығыпты. Бу айдау, агломерациялық, кокстық, сондай-ақ әк күйдіру, оттегі-конвертерлік және көмір дайындау цехы талапқа сай емес. Жоғарыда аталған барлық факті мен экологиялық талаптардың орындалмауы Экологиялық кодекстің 69-бабы, 3-тармағының бұзылғанын айғақтап отыр. Онда «Табиғатты пайдаланушылар қоршаған ортаға эмиссияға рұқсатта көрсетілген шарттарды орындауға міндетті және оларды сақтамағаны үшін Қазақстан Республикасының заңдарына сәйкес жауапты болады» делінген. Жүргізілген тексеру қорытындысы бойынша, Экология министрлігі «Арселор Миттал Теміртау» кәсіпорнына айыппұл салған. Одан бөлек, кәсіпорынға сомасы шамамен 1 млрд теңгеден асатын залалды өтеу туралы нұсқау жіберіліпті. Егер «Арселор Миттал Теміртау» цехтарын қайта жөнге келтірмесе, қызметін толығымен тоқтатуы мүмкін. Бұл тұста кәсіпорынның вице-президенті Виджай Гоял алдағы төрт жылда қалдық көлемін кем дегенде 30 пайызға азайтып, автоматтандыруды қамтамасыз етуге және Теміртау қаласында 500 мың ағаш отырғызуға уәде бергенін айта кеткен жөн.Мадияр ТӨЛЕУ